मुंबईत दुर्घटना, आमदार गुवाहाटीत; तिकडूनच जखमी आणि मृतांच्या कुटुंबियांना जाहीर केली मदत
मुंबई : पावसाळ्याला सुरुवात होताच मुंबईत दुर्घटना घडू लागल्या आहेत. कुर्ला पूर्व येथील नाईक नगर सोसायटीतील चार मजली इमारत सोमवारी रात्री कोसळली. या दुर्घटनेत तीन जणांचा मृत्यू झाला असून मृतांची संख्या आणखी वाढण्याची भीती व्यक्त केली जात आहे. इमारत कोसळल्यानंतर प्रशासनाने बचावकार्य सुरू केलं आहे. मात्र ज्या कुर्ला परिसरात ही दुर्घटना घडली तेथील स्थानिक आमदार मंगेश कुडाळकर हे मात्र सध्या गुवाहाटी येथील ‘रॅडिसन ब्ल्यू’ या हॉटेलमध्ये वास्तव्यास आहेत. कुडाळकर यांनी तेथूनच दुर्घटनाग्रस्त कुटुंबियांना १ लाख रुपयांची तर मृत व्यक्तींच्या नातेवाईकांना ५ लाख रुपयांची मदत देण्यात येणार असल्याची घोषणा केली आहे.
शिवसेना नेते आणि मंत्री एकनाथ शिंदे यांच्या नेतृत्वाखाली पक्षाच्या ४० पेक्षा जास्त आमदारांनी पक्षनेतृत्वाविरोधात बंड केलं आहे. या बंडखोर आमदारांनी थेट आसाममधील गुवाहाटी शहर गाठलं असून तिथून राज्य सरकारला आव्हान दिलं जात आहे. या बंडखोरांमध्ये राज्य मंत्रिमंडळातील आठ ते नऊ मंत्र्यांचाही समावेश आहे. सरकारमधील आमदार आणि मंत्र्यांनीच बंडाचा पवित्रा घेतल्याने राज्यकारभारावरही मोठा परिणाम होत असल्याचं दिसत आहे. मात्र मतदारसंघात दुर्घटना घडल्यानंतर मंगेश कुडाळकर यांनी बंडखोर गटाचे नेते एकनाथ शिंदे यांच्या माध्यमातून दुर्घटनाग्रस्तांना मदत देण्यात येणार असल्याचं स्पष्ट केलं आहे.
‘दुःखद घटना. नाईक नगर, कुर्ला (पू) येथे चार मजली इमारत कोसळून दुर्घटना घडली. अग्निशामक दल, महानगरपालिका, पोलीस यंत्रणा यांच्या माध्यमातून बचावकार्य सुरू आहे. तसंच कुटुंबियांना १ लाख व मृत व्यक्तींच्या नातेवाईकांना ५ लाख रुपयांची मदत मंत्री एकनाथ शिंदे आणि आमदार मंगेश कुडाळकर यांच्यातर्फे करण्यात येईल,’ असं ट्वीट कुडाळकर यांनी केलं आहे.
दरम्यान, कुर्ला इमारत दुर्घटना परिसरात एनडीआरएफच्या जवानांकडून रात्रभर बचावकार्य सुरू होते. या घटनेची माहिती मिळाल्यानंतर मुंबई उपनगराचे पालकमंत्री आदित्य ठाकरे यांनी तात्काळ रात्री २ वाजता कुर्ल्यातील इमारत दुर्घटनास्थळी भेट दिली. यावेळी, संबंधित अधिकारी आणि यंत्रणेशी संवाद साधत त्यांनी मदत व बचावकार्य वेगात सुरूच ठेवण्याचे निर्देश दिले होते.
