पुण्यात १ जानेवारीपासून हेल्मेटसक्तीची अंमलबजावणी !
पुणे – पुण्यात वाहन चालकांच्या सुरक्षेसाठी येत्या १ जानेवारी २०१९ पासून हेल्मेटसक्तीची अंमलबजावणी करण्यात येईल, अशी माहिती पोलीस आयुक्त के. वेंकटेशम यांनी दिली आहे. मात्र, या सक्तीला पुणेकर सकारात्मक प्रतीसाद देतात की मागील दोन वेळेप्रमाणे पुन्हा हेल्मेट सक्तीची अंमलबजावणी थांबबावी लागते. याबाबत साशंकता व्यक्त केली जात आहे.
याबाबत अधिक माहिती अशी की, सर्वोच्च न्यायालयाने आदेश देऊनही दुचाकीस्वार हेल्मेट वापरत नाहीत. परिणाम म्हणून संपूर्ण देशभरातील सुमारे ३५ हजार व्यक्तींचा मृत्यू हेल्मेट परिधान न केल्यामुळे झाल्याची धक्कादायक आकडेवारी मागील काही दिवसांपूर्वी समोर आली होती.या सर्व बाबी लक्षात घेऊन पुण्यात हेल्मेटसक्ती करण्यात येणार आहे. सध्या पुणे शहरात सुमारे २७ लाख दुचाकी असून दिवसेंदिवस त्यांची वाढती संख्या आहे. वाहनांची दाटी आणि अरुंद रस्ते यामुळे अपघातांचे प्रमाणही वाढत आहे. त्यामुळे शहरात हेल्मेट सक्ती गरजेची आहे.