निवृत्त कार्यकारी अभियंत्याचा अपघातात मृत्यू

पुणे : क्रेनने सायकलस्वाराला चिरडल्याची घटना शनिवारी सकाळी पावणेदहाच्या सुमारास कर्वे रस्त्यावर सोनल हॉलसमोर घडली. सायकलस्वाराच्या डोक्यावरून क्रेनचे चाक गेल्याने त्यांचा जागीच मृत्यू झाला आहे. या प्रकरणी क्रेनचालकावर डेक्कन पोलिस ठाण्यात गुन्हा दाखल झाला आहे.

काय घडलं?
कृष्णा गणपती देवळी (वय ६७, रा. आनंदनगर, सिंहगड रस्ता) असे मृत्यू झालेल्याचे नाव आहे. या प्रकरणी सलामत अली (वय २६, रा. नवले पूल परिसर, मूळ रा. उत्तर प्रदेश) असे गुन्हा दाखल झालेल्याचे नाव आहे. देवळी हे जलसंपदा विभागातून कार्यकारी अभियंतापदावरून निवृत्त झाले होते. देवळी यांच्या पश्चात पत्नी आणि विवाहित मुलगी असा परिवार आहे. देवळी यांचा आज वाढदिवस होता.

पोलिसांनी दिलेल्या माहितीनुसार, शनिवारी सकाळी पावणेदहाच्या सुमारास सायकलस्वार देवळी हे कोथरूडकडून डेक्कनच्या दिशेने जात होते. सलामत अली हा क्रेन घेऊन डेक्कनच्या दिशेने चालला होता. देवळी रस्त्याच्या डाव्या बाजूने जात असताना मागून आलेल्या क्रेनचा त्यांना धक्का लागला. त्यामुळे ते रस्त्यावर पडले आणि क्रेनचे मागील चाक त्यांच्या डोक्यावरून गेले. यात देवळी यांचा जागीच मृत्यू झाला. अपघातानंतर क्रेनचालक थेट डेक्कन पोलिस ठाण्यात गेला. तेथे त्याने पोलिसांना अपघाताची माहिती दिल्याचे वरिष्ठ निरीक्षक विपीन हसबनीस यांनी सांगितले.

घटनेची माहिती मिळताच पोलिसांनी घटनास्थळी धाव घेतली. देवळी यांचा मृतदेह शवविच्छेदनासाठी ससून रुग्णालयात पाठविला. क्रेनचालकाला वैद्यकीय तपासणीसाठी ससून रुग्णालयात पाठविले. शनिवारी रात्री उशिरापर्यंत डेक्कन पोलिस ठाण्यात गुन्हा दाखल करण्याचे काम सुरू होते.

कृष्णा देवळी यांनी रुरकी येथून हायड्रोलॉजी विषयात अभियांत्रिकीची पदव्युत्तर पदवी घेतली होती. ते मूळचे कोल्हापूर जिल्ह्यातील गारगोटी येथील होते. ३१ मे २०१५ मध्ये ते सेवानिवृत्त झाले. देवळी यांनी सरकारच्या विविध महत्त्वाच्या प्रकल्पांवर काम केले. उजनी धरणासह अलमट्टी धरण प्रकल्पांत त्यांनी विशेष काम केले. अलमट्टी धरणाच्या संदर्भात काम करणाऱ्या कर्नाटक-महाराष्ट्राच्या संयुक्त समितीमध्येही त्यांचा सहभाग होता.

सायकल चालविण्याची होती आवड
देवळी २०१५मध्ये सेवानिवृत्त झाले होते. त्यानंतरही ते कृष्णा खोरे लवादावर सल्लागार म्हणून कार्यरत होते. देवळी यांना सायकल चालविण्याची आवड होती. आठवड्यातून काही दिवस ते शहरात सायकलवर फेरफटका मारत असत. ठरल्याप्रमाणे ते शनिवारी आनंदनगर येथून सायकल चालवित निघाले होते.

‘चक्कर मारून घरी जातो’

देवळी सायकलवरून घराबाहेर पडले. त्यांनी मित्राला कर्वेनगर येथील राजा मंत्री रस्त्यावर (डीपी रस्ता) भेटण्यासाठी बोलावून घेतले होते. तेथे त्यांनी चहा प्यायला आणि गप्पा मारल्या. त्यानंतर देवळी ‘चक्कर मारून घरी जातो,’ असे सांगून पुढे गेले. मात्र, काही अंतरावरच काळाने त्यांना गाठले, अशी भावना त्यांच्या मित्राने व्यक्त केली.
परभणीत कोणाचं नाणं खणखणणार? संजय जाधव आघाडीवर, त्यांची पहिली प्रतिक्रिया काय?

‘क्रेन’ विनानोंदणी रस्त्यावर?

अपघातग्रस्त क्रेन मेट्रोच्या कामासाठी वापरली जात होती, अशी चर्चा होती. क्रेन नवीन असून, त्यावर नंबर प्लेट नव्हती. त्यावरून त्या क्रेनची परिवहन विभागाकडे नोंदणी झालेली नाही, असा संशय व्यक्त केला जात आहे. त्यानुसार प्रादेशिक परिवहन विभागाला कळविणार असल्याचे वरिष्ठ निरीक्षक विपीन हसबनीस यांनी सांगितले. दरम्यान, कर्वे रस्त्यावर अथवा आजबाजूला मेट्रोचे कोणतेही काम सुरू नाही. त्यामुळे ही क्रेन मेट्रोच्या कामासाठीची नव्हती, असा दावा मेट्रो प्रशासनाने केला.