अरेच्चा! कोंबड्या अंडी देत नाहीत, म्हणून पोलिसात तक्रार
![Oh no! The hens do not lay eggs, so report to the police](https://mahaenews.com/wp-content/uploads/2021/04/images.jpg)
पुणे – जिल्ह्यातील लोणी काळभोर पोलीस ठाण्यात चक्क कोंबड्या अंडी देत नसल्याची तक्रार आली आहे. या तक्रारीनंतर पोलीसही चक्रावून गेले आहेत. मात्र आता हा प्रकार नक्की काय आहे आणि कशामुळे घडला याचा शोध पोलीस घेत आहेत.
त्याचे झाले असे की, लोणी काळभोर परिसरातील म्हातोबाची आळंदी येथील काही पोल्ट्री फार्ममधील कोंबड्यांनी मागील आठवड्यापासून अंडी देणे बंद केले. यामुळे तेथील पोल्ट्री व्यवसायिकांचे लाखो रुपयांचे नुकसान होत असल्याचा दावा करण्यात आला आहे. याप्रकरणी पोल्ट्री चालकांनी पोलिसांकडे धाव घेत तक्रार दाखल केली आहे. ही तक्रार बघून पोलिसांनाही धक्का बसला.
मिळालेल्या माहितीनुसार, म्हातोबाची आळंदी परिसरातील लक्ष्मण भोंडवे हे पोल्ट्री चालक आहेत. त्यांनी 11 एप्रिल रोजी एका कंपनीकडून कोंबड्याचे खाद्य घेतले. त्यांनी घेतलेले कोंबड्यांचे खाद्य दररोज कोंबड्यांना दिले जात होते. हे खाद्य कोंबड्यांना दिल्यापासून कोंबड्यांनी अंडी देणेच बंद केले. कोंबडी अंडी का देत नाहीत, हा प्रश्न निर्माण झाला. कोणी अंड्यांची चोरी करत आहे का, याची शंकाही निर्माण होऊ लागली. मात्र चोरी होत नसल्याचे लक्षात आल्यानंतर कोंबड्यांची तपासणी करण्याचे ठरले. त्यानुसार पोल्ट्री व्यवसायिकांनी एका लॅबमध्ये कोंबड्यांची तपासणी केली. त्यामध्ये नव्याने देण्यात येत असलेल्या खाद्यामुळे कोंबडी अंडी देत नसल्याचे प्राथमिक तपासणीत दिसून आले आहे. या संपूर्ण प्रकरणाबाबत तज्ज्ञ डॉक्टरांशी चर्चा करण्यात आली आहे. खातरजमा केल्यानंतर पोलिसांत तक्रार करण्याचा निर्णय घेण्यात आला. दरम्यान, संपूर्ण प्रकरणाची चौकशी करून संबधित कंपनीवर कारवाई केली जाईल, अशी माहिती लोणी काळभोर पोलीस स्टेशनचे वरिष्ठ निरीक्षक राजेंद्र मोकाशी यांनी दिली.