पुणे : कल्याणीनगर अपघातानंतर दुसरा मोठा अपघात खराडी जुना जकातनाका येथे घडला. नगर रस्त्यावर खराडी जकात नाका येथे भरधाव ट्रकने दुचाकीवरील दोन महाविद्यालयीन तरुणांना धडक दिली. अपघातात महाविद्यालयीन तरुण आदिल शेख आणि त्याच्या मित्राचा मृत्यू झाला. अपघातात एकजण गंभीर जखमी झाला आहे. सोमवारी रात्री दहाच्या सुमारास अपघात घडला.
अपघातात मृत्युमुखी पडलेले तरुण वाघोली येथे महाविद्यालयीन शिक्षण घेत होते. ते मूळचे लातूर येथील उदगीरचे आहेत. अपघातात एकजण गंभीर जखमी असून त्याच्यावर खासगी रुग्णालयात उपचार सुरू आहेत. मालवाहतूक करणारा ट्रक वाघोलीतून पुण्याकडे येत असताना खराडी जुना जकातनाका येथे अपघात घडला. याप्रकरणी ट्रक ड्रायव्हरला ताब्यात घेण्यात आले आहे, अशी माहिती पोलिसांनी दिली आहे. श्यामबाबू रामफळ गौतम असे चालकाचे नाव आहे.
पोलिसांनी दिलेल्या माहितीनुसार, ट्रक चालक शामबाबू गौतम हा वाघोलीहून चंदननगरकडे जात होता. जकात नाका येथे सिग्नलवर थांबलेल्या दुचाकीला ट्रकने मागून जोरात धडक दिली. त्यामध्ये दुचाकीवर असणारे तीनजण फरफटत गेले. अपघातात दोनजणांचा मृत्यू झाला.
