मी फक्त घटक पक्षाचा आमदार, उपोषणाला बसायला मोकळा; छगन भुजबळ नेमकं काय म्हणाले?

0 10,025 1 minute read

पुणे : मी फक्त सरकार मधील घटक पक्षाचा आमदार आहे. त्यामुळे मी उपोषण करायला मोकळा आहे. बाकीच्या जबाबदारी असल्या तर थोडीशी अडचण होते, अशी खोचक प्रतिक्रिया राष्ट्रवादी काँग्रेसचे नेते छगन भुजबळ यांनी दिली आहे. महात्मा फुले वाड्याच्या कामाची पाहणी करण्यासाठी छगन भुजबळ पुण्यामध्ये आले होते. त्यावेळी त्यांनी माध्यमांशी संवाद साधला.

विधानसभा निवडणुकीनंतर करण्यात आलेल्या मंत्रिमंडळ विस्तारामध्ये छगन भुजबळ यांना स्थान देण्यात आलं नव्हतं. त्यानंतर छगन भुजबळ यांनी उघड उघड आपली नाराजी व्यक्त केली होती. दरम्यानच्या काळामध्ये भुजबळ यांनी याबाबत बोलणं टाळलं असल्याचं दिसत आहे. आज पुण्यातील महात्मा फुले वाड्याच्या रखडलेला कामाच्या निमित्ताने छगन भुजबळ यांनी आपण फक्त आमदार असल्याच म्हणत अप्रत्यक्षपणे खंत व्यक्त केली.

छगन भुजबळ म्हणाले, जेव्हा पासून महात्मा फुलेवाडा वाडा देशाला अर्पण करण्यात आला आहे. तेव्हा पासून आणि त्यापूर्वी पासून अनेक लोक याठिकाणी येतात. याठिकाणी सभा घेण्यासाठी जागा नाही. अनेक वर्षे जागा मिळावी यासाठी प्रयत्न करीत आहे. हे 100 ते 200 कोटींचे काम आहे. यासाठी अनेक वर्षे प्रयत्न करून देखील प्रयत्नांना यश येताना पाहायला मिळत नाही, असं छगन भुजबळ म्हणाले.

हेही वाचा – सीएनजीमध्ये पुन्हा दरवाढ

पुढे बोलताना म्हणाले, मुख्यमंत्री, उपमुख्यमंत्री देखील सकारात्मक आहेत. मात्र, पालिकच्या अधिकाऱ्यांशी लोकांशी संवाद साधून जागा मोकळी करून घेणे आवश्यक आहे. इतर ठिकाणी ज्या पद्धतीने जमीन अधिग्रहण केले जाते, त्या पद्धतीने या जागेचे अधिग्रहण केले जात नाही. जागा ताब्यात घेण्याचा या ठिकाणचा वेग शून्य आहे. जमीन अधिग्रहणाबाबत पालिका अधिकारी नुसते टोलवा टोळवी करत आहेत. यामध्ये प्रगती न झल्यास आंदोलन करण्याची वेळ येईल, असा इशारा छगन भुजबळ यांनी दिला.

छगन भुजबळ म्हणाले, या गोष्टी सरकारला विचारायला हवं या ठिकाणी जे मंत्री, पालकमंत्री यांना विचारायला हवा की या गोष्टीसाठी आंदोलन का ? करावा लागत आहे. मी फक्त सरकार मधील घटक पक्षाचा आमदार आहे. त्यामुळे मी उपोषण करायला मोकळा आहे. बाकीच्या जबाबदारी असल्या तर थोडीशी अडचण होते, अशी खोचक प्रतिक्रिया छगन भुजबळ यांनी दिली.