एचएसआरपी बसविण्यासाठी मुदतवाढ; २५ लाख वाहनांना ही नंबर प्लेट बसवावी लागणार

पुणे : हाय सिक्युरीटी रजिस्ट्रेशन प्लेट (एचएसआरपी) बसविण्यासाठी ३१ मार्चपर्यंतची मुदत होती. मात्र, वाहनांची संख्या मोठ्या प्रमाणात असल्याने राज्य परिवहन विभागाने एचएसआरपी बसविण्यासाठी एक महिन्याची मुदतवाढ दिली आहे. त्यामुळे वाहनांनी आता ३० एप्रिल २०२५ पूर्वी एचएसआरपी बसवून घ्यावी, असे आवाहन परिवहन विभागाने केले आहे.

राज्यात २०२९ पूर्वीच्या सर्व वाहनांना एचएसआरपी बसविणे सर्वोच्च न्यायालयाच्या आदेशानंतर बंधनकारक करण्यात आले आहे. त्यामुळे पुण्यात २५ लाखांपेक्षा जास्त वाहनांना ही नंबरप्लेट बसवावी लागणार आहे. त्यासाठी एका कंपनीला काम देण्यात आले असून ही नंबरप्लेट बसविण्यास सुरुवात झाली आहे.

मात्र, वाहन चालकांचा म्हणावा असा प्रतिसाद अद्याप मिळत नाही. आतापर्यत केवळ १५ ते १६ हजार जणांनी नंबर प्लेटसाठी अर्ज केले असून, त्यातील सात ते आठ हजार वाहनांना ही नंबरप्लेट बसविण्यात आली आहे. त्यामुळे २५ लाख वाहनांना नंबर प्लेट कधी बसणार असा प्रश्न पडतो.

हेही वाचा –  नऊ तालुक्यांमध्ये होणार पीएमआरडीएची कार्यालये

त्यामुळे ३१ मार्चपर्यंत ऐवढ्या मोठ्या प्रमाणात वाहनांना ही नंबरप्लेट बसविणे शक्य नाही. त्यामुळे परिवहन विभागाने ही नंबरप्लेट बसविण्यासाठी मुदतवाढ द्यावी, अशी मागणी केली जात होती. त्यानुसार परिवहन विभागाने ३० एप्रिल २०२५ पर्यंत नंबरप्लेट बसविण्यासाठी मुदतवाढ देण्याचा निर्णय घेतला आहे. याबाबतचे आदेश सर्व प्रादेशिक परिवहन कार्यालयांना देण्यात आले आहेत.

एचएसआरपी बसवण्याचा कारभार सुलभ आणि वेगवान व्हावा, याकरिता परिवहन विभागाकडून राज्यात तीन झोन (विभाग) तयार करण्यात आले आहेत. त्या झोनमध्ये राज्यातील आरटीओ कार्यालयांची विभागणी करण्यात आली असून, यामुळे हाय सिक्युरिटी बसवण्याचे कामकाज वेगाने होणार असल्याचा विश्वास व्यक्त केला जात आहे. झोन एक अंतर्गत १२, झोन दोन अंतर्गत १८ तर झोन तीन अंतर्गत २७ आरटीओ कार्यालयांचा समावेश केला आहे. त्यामध्ये झोन एक मध्ये पुणे आरटीओचा समावेश आहे.

महाईन्यूज-X वर फॉलो करा : महाईन्यूजला instagram वर फॉलो करा