गावी निघालेल्या विद्यार्थ्याची थकीत दंडाच्या नावाखाली अडवणूक ; स्पर्धा परीक्षेची तयारी करणाऱ्या युवकाचे आंदोलन
![Detention of a student leaving for the village in the name of outstanding fine](https://mahaenews.com/wp-content/uploads/2022/10/Traffic-Police-780x470.jpg)
पुणे : स्पर्धा परिक्षेची तयारी करणाऱ्या युवकाला दुचाकीवर असलेल्या थकीत दंड भरण्यास सांगितल्याने त्याने लोकमान्य टिळक चौकात सोमवारी धरणे आंदोलन केले.
दिवाळीच्या सुट्टीत युवक मूळगावी निघाला होता. दंड भरल्याशिवाय दुचाकी सोडणार नाही, असे पोलिसांनी सांगितले. युवकाने विनंती केल्यानंतर पोलिसांनी त्याला सोडले नाही. अखेर पोलिसांनी त्याची मनधरणी केली. मूळगावी पाठविण्याचे आश्वासन पोलिसांनी दिल्यानंतर त्याने आंदोलन मागे घेतले.
राहुल धांडे स्पर्धा परीक्षेची तयारी करत आहे. तो सोमवारी (१७ ऑक्टोबर) दुपारी तीनच्या सुमारास यवतमाळला निघाला होता. दुपारी सव्वातीनच्या सुमारास त्याची रेल्वे यवतमाळला रवाना होणार होती. राहुलचा मित्र दुचाकी चालवित होता. दुचाकी राहुलच्या नावावर होती. लोकमान्य टिळक चौकात त्याची दुचाकी पोलिसांनी अडवली. राहुलच्या दुचाकीवर दंड असल्याचे लक्षात आल्यानंतर पोलिसांनी कारवाई सुरू केली. दंडाची रक्कम भरल्याशिवाय दुचाकी सोडणार नाही, असे पोलिसांनी सांगितले. मी गावी निघालो आहे. आता माझ्याकडे पैसे नाही. ऑनलाइन दंड भरतो, असे त्याने पोलिसांना सांगितले. दरम्यान, रेल्वेची वेळ निघून गेल्यानंतर राहुलने रस्त्यावर आंदोलन सुरू केले. अर्धा ते पाऊणतास तो रस्त्यावर बसून होता. अखेर पोलिसांनी खासगी प्रवासी बसने यवतमाळला पाठविण्याची व्यवस्था करतो, असे आश्वासन राहुलला दिले. त्यानंतर त्याने आंदोलन मागे घेतले. भर रस्त्यात युवकाने आंदोलन केल्याने बघ्यांची गर्दी झाली होती.