२९ व्या मराठी बालकुमार साहित्य संमेलनात लहान मुलांसाठी विविध कार्यक्रम

पुणे |महाईन्यूज|

अमरेंद्र भास्कर मराठी बालकुमार साहित्य संस्था आणि श्री खंडेराय प्रतिष्ठान यांच्यातर्फे येत्या ८ व ९ फेब्रुवारी होणाऱ्या २९ व्या मराठी बालकुमार साहित्य संमेलनात लहान मुलांसाठी विविध कार्यक्रम घेण्यात येणार आहेत. मुलांचे कविसंमेलन आणि कथाकथनाचे विशेष कार्यक्रम होणार असून त्यात राज्यभरातील मुले सहभागी होणार आहेत.

या संमेलनाचा सविस्तर कार्यक्रम मंगळवारी साहित्य संस्थेच्या अध्यक्षा संगीता बर्वे, उपाध्यक्ष माधव राजगुरू आणि संमेलनाचे स्वागताध्यक्ष गणपतराव बालवडकर यांनी जाहीर केला. बालेवाडी येथील म्हातोबा तुकाराम बालवडकर विद्यालयाच्या प्रांगणात हे दोन दिवसीय संमेलन होणार आहे.

‘प्रसिद्ध लेखक, कवी प्रवीण दवणे यांची संमेलनाध्यक्षपदी निवड झाली आहे. पहिल्या दिवशी दुपारी मुलांसाठी ‘हसती, नाचती, खेळती मुले जिथे’ हा विशेष कार्यक्रम सादर केला जाणार आहे. दुसऱ्या दिवशी ‘सुंदर माझी शाळा’ हा बालगीतांचा कार्यक्रम सादर होणार आहे. या संमेलनात पुण्यासह मुंबई, औरंगाबाद, नांदेड, परभणी, संगमनेर, बीड, फलटण, सातारा, कोल्हापूर अशा अनेक ठिकाणांहून लहान मुले सहभागी होणार आहेत,’ अशी माहिती संगीता बर्वे यांनी दिली. या दोन दिवसांच्या संमेलनाला आसपासच्या शाळांमधील मुले मोठ्या संख्येने उपस्थित राहणार असल्याचे स्वागताध्यक्ष बालवडकर यांनी सांगितले.

८ फेब्रुवारी

स. ९ : ग्रंथदिंडी

स. १० : संमेलनाचे उद्घाटन

दु. २ : ‘हसती, नाचती, खेळती मुले जिथे’ कार्यक्रमाचे सादरीकरण

दु. ३.३० : कविसंमेलन

९ फेब्रुवारी

स. ९ : संमेलनाध्यक्ष प्रवीण दवणे यांची मुलाखत

स. १० : ऐका माझी गोष्ट (मुलांचे कथाकथन)

दु. १ : ‘सुंदर माझी शाळा’ बालगीतांचा कार्यक्रम

दु. २ : पुस्तक प्रकाशन व संमेलनाचा समारोप