कोल्हापूर: – होम क्वारंटाइनमधील पुजारी मंदिरासमोरील देवालयात पूजा करण्यासाठी आल्याचा धक्कादायक प्रकार सीसीटीव्ही फुटेजमुळं उघडकीस आल्यानंतर यंत्रणेची तारांबळ उडाली. या पुजाऱ्याविरोधात आदेशाचे उल्लंघन केल्याप्रकरणी गुन्हा नोंदवण्यात आला आहे.
करोनाचा प्रादुर्भाव वाढत आहे. रुग्णांची संख्या दिवसेंदिवस वाढत आहे. त्यामुळं खबरदारी म्हणून राज्य सरकार, स्थानिक पोलीस प्रशासनानं अनेक निर्बंध उपाय योजले आहेत. राज्यात संचारबंदी लागू केली आहे. तसेच संशयित किंवा होम क्वारंटाइनमधील रुग्ण घराबाहेर पडल्याचे दिसून आल्यास, संबंधितांवर कारवाई करण्यात येत आहे. कोल्हापुरातील एक वृद्ध पुजारी करोनासदृश्य लक्षणं आढळून आल्यानं होम क्वारंटाइनमध्ये होते. मात्र, आदेशाचे उल्लंघन करत ते मंदिरात पूजेसाठी आले होते. सीसीटीव्हीमुळं हा धक्कादायक प्रकार उघडकीस आला. त्यानंतर स्थानिक आरोग्य यंत्रणेची तारांबळ उडाली. या प्रकरणी संबंधित पुजाऱ्यावर गुन्हा नोंदवण्यात आला आहे.
