रातोरात आमचे नगरसेवक चोरणारे काय सहकार्य करणार? संदीप देशपांडेंचा शिवसेनेवर पलटवार
मुंबई : मनसे अध्यक्ष राज ठाकरे यांनी आपला अयोध्या दौरा स्थगित केल्यानंतर राजकीय वर्तुळातून विविध प्रतिक्रिया उमटत आहेत. राज ठाकरे यांना काही मदत लागली असती तर आम्ही केली असती, असा टोला शिवसेना नेते संजय राऊत यांनी लगावला होता. त्यावर आता मनसेकडून संदीप देशपांडे यांनी पलटवार केला आहे.
‘रातोरात आमचे नगरसेवक चोरणारे आमची काय मदत करणार? ज्यांनी आमच्या कार्यकर्त्यांना तडीपार केलं, आम्हाला अटक करण्यासाठी आटोकाट प्रयत्न केले, त्यांच्याकडून आम्ही सहकार्याची अपेक्षा ठेवावी का?’ असा सवाल करत संदीप देशपांडे यांनी शिवसेनेच्या टीकेला प्रत्युत्तर दिलं आहे. तसंच अयोध्या दौरा स्थगित करण्याच्या निर्णयावर राज ठाकरे हे रविवारी पुण्यातील सभेत बोलतील, असंही देशपांडे म्हणाले. दरम्यान, संदीप देशपांडे यांनी संजय राऊत यांच्या पत्रकार परिषदेला ‘कपिल शर्मा शो’ असं संबोधत त्यांची खिल्ली उडवली आहे.
नेमकं काय म्हणाले होते राऊत?
संजय राऊत यांनी राज ठाकरेंचा अयोध्या दौरा स्थगित झाल्यानंतर तिरकस शब्दांत भाष्य केलं होतं. ‘राज ठाकरे यांच्या अयोध्या दौऱ्यात नेमक्या काय अडचणी आल्या, हे मला माहीत नाही. मात्र भाजपने त्यांच्या बाबतीत असं का करावं? यातून काही लोकांना शहाणपण आलं तर बरं होईल. कारण यामुळे महाराष्ट्रातील नेतृत्वाचं आणि महाराष्ट्राचं नुकसान होतं. आम्हाला या मुद्द्यावरून राजकारण करायचं नाही. आमचा एक मदत कक्ष आहे, कोणाला देवदर्शनाला जायचं असेल तर आम्ही मदत करतो. राज ठाकरे यांना मदत हवी असती तर आम्ही केली असतं,’ असा टोला राऊत यांनी लगावला आहे.
