रामदास कदम अचानक संजय राऊतांच्या भेटीला; राजकीय तर्कवितर्कांना उधाण
मुंबई |
गेल्या काही दिवसांपासून ‘मातोश्री’च्या वक्रदृष्टीमुळे पक्षसंघटनेत बाजूला सारले गेलेले शिवसेनेचे ज्येष्ठ नेते रामदास कदम हे आज शिवसेना खासदार संजय राऊतांच्या भेटीला त्यांच्या निवासस्थानी गेले होते. संजय राऊत आणि रामदास कदम यांच्या अचानक झालेल्या या भेटीने राजकीय वर्तुळात चर्चांना उधाण आलं आहे. या भेटीत नेमकं कुठल्या विषयावर चर्चा झाली हे अद्याप गुलदस्त्यात आहे. तरी, ही भेट रामदास कदम आणि शिवसेनेच्या मनोमिलनचे संकेत देत आहे.
- शिवससेना प्रमुखांचा भगवा झेंडा मरोपर्यंत माझ्या खांद्यावर असेल – रामदास कदम
शिवससेना प्रमुखांचा भगवा झेंडा मरोपर्यंत माझ्या खांद्यावर असेल. मी पक्षाशी कधीही बेईमानी करणार नाही, असं वक्तव्य रामदास कदम यांनी केलं. “माझ्याबद्दल अनेक अफवा पसरवल्या गेल्या. शिवसेना प्रमुखांचा, शिवसेनेचा, छत्रपती शिवाजी महाराजांचा भगवा झेंडा माझ्या खांद्यावर मरेपर्यंत असेल. त्याची साथ मी कदापि सोडणार नाही. मी स्वत:ला डाग लागू देणार नाही. पक्षाशी बेईमानी करणार नाही”, असं रामदास कदम म्हणाले.
- उद्धव ठाकरे आणि रामदास कदमांमध्ये दुरावा
मुख्यमंत्री उद्धव ठाकरे आणि रामदास कदम यांच्यातही दुरावा असल्याचं चित्र गेल्या अनेक काळापासून दिसतंय. त्यामुळे रामदास कदम आणि संजय राऊतांची ही भेट अत्यंत महत्त्वाची मानली जात आहे.
गेल्या काही दिवसांपासून रामदास कदम हे भाजपचा कमळ हाती घेणार असल्याची चर्चा आहे. तर, रामदास कदमही शिवसेना आणि परिवहन मंत्र्यांवर नाराज असल्याचं दिसून आलं. भाजप नेते किरीट सोमय्या यांना दापोलीतील साई रिसॉर्टच्या अनधिकृत बांधकामाबाबतची माहिती रामदास कदमांनी पुरवल्याचा आरोप करण्यात आला होता. तर रामदास कदमांनी पत्रकार परिषद घेत अनिल परबांवर टीकेची झोड उठवली होती. शिवसेना प्रमुख उद्धव ठाकरे आहेत की अनिल परब असंही ते म्हणाले होते.
- आदित्य ठाकरेंकडून योगेश कदमांचा मित्र म्हणून उल्लेख
त्यानंतर, महिन्याभरापूर्वी पर्यावरण मंत्री आदित्य ठाकरे यांनी शिवसेनेतील राजकारणाला वेगळं वळण देत दापोलीच्या एका सभेत रामदास कदमांचे पुत्र योगेश कदम यांचा उल्लेख माझा मित्र म्हणून केला. तसेच, त्यांनी योगेश कदमांना सन्मानाची वागणूकही दिली. त्यानंतर आज कदम आणि राऊतांची ही भेट अनेक संकेत देणारी ठरत आहे.
