इंद्रायणी प्रदूषणाबाबत आढावा बैठक : मंत्री दीपक केसरकरांच्या बैठकीला स्थानिक आमदारांना डावलले!
पिंपरी : इंद्रायणी नदी प्रदूषण आणि पर्यावरणाच्या संदर्भामध्ये नागपूर येथील हिवाळी अधिवेशनामध्ये झालेल्या चर्चेनुसार राज्याचे शिक्षण मंत्री दीपक केसरकर यांनी बालेवाडी येथे बैठक घेतली. मात्र, या बैठकीला स्थानिक आमदार सुनिल शेळके, आमदार महेश लांडगे, आमदार दिलीप मोहिते यांना निमंत्रणच नसल्याचं समोर आलं आहे.
बैठकीस मंत्री दीपक केसरकर, आमदार उमा खापरे, पीएमआरडीए आयुक्त राहुल महिवाल, पिंपरी चिंचवड महानगरपालिका आयुक्त शेखर सिंह, महाराष्ट्र प्रदूषण नियंत्रण मंडळाचे सदस्य सचिव अविनाश ढाकणे, पुणे महानगरपालिकेचे अतिरिक्त आयुक्त कुणाल खेमनार आदी उपस्थित होते.
दीपक केसरकर म्हणाले, प्रक्रिया न केलेले दूषित पाणी नदीत जाणार नाही याची दक्षता घ्यावी. सांडपाण्यावर प्रक्रिया करणारे नवे प्रकल्प उभारताना जुने प्रकल्पही सुरूच राहतील याकडे लक्ष द्यावे. नद्यांचे पाणी शुद्ध राहावे यावर मुख्यमंत्री महोदयांचा भर आहे. नमामि चंद्रभागा प्रकल्पाच्यादृष्टीने इंद्रायणीसोबतच मुळा-मुठा नदीतील प्रदूषण रोखण्याबाबतही विचार करावा लागेल.
हेही वाचा – मामा-भांजेंना ‘दिल्लीचे वेध’ : शिरुर-मावळ लोकसभेसाठी लांडे-वाघेरे अन् लांडगे मैदानात
नद्यांमधील प्रदूषण रोखण्यासाठी मोठ्या गृहनिर्माण संस्थांचे सांडपाणी एकत्र करून त्यावर प्रक्रिया करण्याचा प्रयत्न करावा. नाल्यांमध्ये जाणारे प्रक्रिया न केलेले पाणी थांबविण्यासाठीही उपाययोजना करावी. गृहनिर्माण संस्थांद्वारे सांडपाण्यावर प्रक्रिया होत नसल्याचे आढळल्यास दंडात्मक कारवाई करावी.
स्थानिक स्वराज्य संस्थांनी सांडपाणी व्यवस्थापनावर प्राधान्याने लक्ष द्यावे. ग्रामीण भागात शोषखड्डे तयार करण्यावर भर द्यावा. नगरपालिकेने या विषयासाठी स्वतंत्र पथक तयार करावे. सांडपाणी प्रक्रिया प्रकल्प उभारले जाईपर्यंत प्राथमिक उपाययोजनांद्वारे नद्यांमध्ये जाणारे दूषित पाणी रोखावे, असे निर्देश दीपक केसरकर यांनी दिले.
विविध विभागांनी समन्वयाने उपाययोजना करून नदीत जाणारे दूषित पाणी रोखण्याचे उपाय योजावेत, असे आवाहन उमा खापरे यांनी केले.
