एकनाथ शिंदेंचा अचानक दिल्ली दौरा; राजकीय वर्तुळात चर्चांना उधाण
मुंबई : राज्याचे उपमुख्यमंत्री आणि शिवसेना (शिंदे गट) पक्षप्रमुख एकनाथ शिंदे बुधवारी रात्री अचानक दिल्लीत रवाना झाले. नियोजित कार्यक्रमांना झुगारून त्यांनी घेतलेला हा दौरा राजकीयदृष्ट्या महत्त्वाचा मानला जात असून, यामुळे महाराष्ट्राच्या राजकारणात चर्चांना उधाण आले आहे. विधानसभेचे पावसाळी अधिवेशन सुरू असतानाच शिंदे यांनी दिल्लीत प्रस्थान ठेवले, हे विशेष लक्षवेधी ठरले आहे.
मिळालेल्या माहितीनुसार, शिंदे दिल्लीत केंद्रीय गृहमंत्री अमित शहा यांची भेट घेणार आहेत. मात्र, अद्याप त्यांच्या भेटीचे नेमके कारण अधिकृतपणे स्पष्ट झालेले नाही. दरम्यान, अमित शहा सध्या अहमदाबादमध्ये एका कार्यक्रमासाठी उपस्थित असल्याने, त्यांच्यात प्रत्यक्ष भेट अद्याप झालेली नाही.
या दौऱ्याच्या पार्श्वभूमीवर काही महत्त्वाच्या घडामोडी लक्षात घेण्याजोग्या आहेत. स्थानिक स्वराज्य संस्थांच्या आगामी निवडणुकांच्या पार्श्वभूमीवर भाजप आणि शिंदे गटात हालचाली सुरू झाल्या आहेत. काही दिवसांपूर्वीच भाजपचे नव्याने निवडून आलेले प्रदेशाध्यक्ष रवींद्र चव्हाण यांनी दिल्लीतील भाजपचे राष्ट्रीय अध्यक्ष जे. पी. नड्डा आणि केंद्रीय मंत्री नितीन गडकरी यांची भेट घेतली होती. तसेच, पुणे दौऱ्यादरम्यान चव्हाण यांनी अमित शहा यांच्याशीही भेट घेतली होती.
हेही वाचा – गणेशोत्सवसंदर्भात महत्त्वाची बातमी; सांस्कृतिक मंत्र्यांची मोठी घोषणा
दरम्यान, शिंदे गटाच्या आमदार संजय गायकवाड यांनी विधानभवनातील कँटीनमध्ये कर्मचाऱ्याला मारहाण केल्याच्या प्रकारामुळे सध्या त्यांच्यावर टीकेची झोड उठली आहे. शिळे जेवण दिल्याच्या कारणावरून झालेल्या या वादानंतर उपमुख्यमंत्री देवेंद्र फडणवीस यांनीही गायकवाड यांच्या वर्तनाबाबत नाराजी व्यक्त केली आहे. “या प्रकारातून सगळ्या आमदारांबद्दल जनतेत चुकीची भावना निर्माण होते,” असे फडणवीस म्हणाले.
तसेच, हिंदी सक्तीविरोधातील आंदोलनाच्या पार्श्वभूमीवर शिवसेना (उद्धव बाळासाहेब ठाकरे) पक्षप्रमुख उद्धव ठाकरे आणि मनसे अध्यक्ष राज ठाकरे तब्बल १९ वर्षांनंतर एका मंचावर एकत्र आले. दोघांनी एकत्र राहण्याचे संकेतही दिले. या राजकीय जवळीकीचा परिणाम स्वराज्य संस्थांच्या निवडणुकांवर होण्याची शक्यता असल्याने शिंदे गटही सावध झाला आहे, असे राजकीय विश्लेषकांचे म्हणणे आहे.
या सर्व घडामोडींच्या पार्श्वभूमीवर एकनाथ शिंदे यांचा अचानक दिल्ली दौरा आणि त्यांनी घेतलेली भेटीगाठी ही केवळ सौजन्य भेट ठरणार आहेत की यामागे काही मोठी रणनीती आहे, हे पाहणे औत्सुक्याचे ठरणार आहे. विधानसभा अधिवेशन सुरू असतानाही घेतलेला हा दौरा निश्चितच महत्त्वपूर्ण मानला जात आहे.
