C P Radhakrishnan | सी. पी. राधाकृष्णन यांनी घेतली उपराष्ट्रपतीपदाची शपथ
महाराष्ट्राच्या राज्यपालपदाचा अतिरिक्त कार्यभार आता गुजरातच्या राज्यपालांकडे
C P Radhakrishnan | देशाचे १५ वे उपराष्ट्रपती म्हणून सी.पी. राधाकृष्णन यांनी आज (१२सप्टेंबर) शपथ घेतली. राष्ट्रपती द्रौपदी मुर्मू यांनी त्यांना पद आणि गोपनीयतेची शपथ दिली. या सोहळ्याला पंतप्रधान नरेंद्र मोदी, गृहमंत्री अमित शहा यांच्यासह अनेक प्रमुख नेते उपस्थित होते.
उपराष्ट्रपतीपदाच्या नुकत्याच झालेल्या निवडणुकीत राधाकृष्णन यांनी इंडिया आघाडीचे उमेदवार बी. सुदर्शन यांचा पराभव करून विजय मिळवला होता. राधाकृष्णन याआधी महाराष्ट्राचे राज्यपाल म्हणून कार्यरत होते. राष्ट्रीय स्वयंसेवक संघाचे स्वयंसेवक ते उपराष्ट्रपती असा त्यांचा राजकीय प्रवास आतापर्यंत झाला आहे.
हेही वाचा : मी मुख्यमंत्री देवेंद्र फडणवीस यांचा आदर करतो पण..; छगन भुजबळ यांचं वक्तव्य
उपराष्ट्रपती म्हणून त्यांची निवड झाल्यामुळे त्यांनी आपल्या राज्यपालपदाचा राजीनामा दिला. त्यामुळे महाराष्ट्राच्या राज्यपालपदाचा अतिरिक्त कार्यभार आता गुजरातचे राज्यपाल आचार्य देवव्रत यांच्याकडे सोपवण्यात आला आहे. याबाबतचे निवेदन राष्ट्रपती द्रौपदी मुर्मू यांनी जारी केले आहे.
आचार्य देवव्रत यांच्याकडे आता गुजरातसोबतच महाराष्ट्राच्या राज्यपालपदाचीही जबाबदारी असणार आहे. ते २०१९ पासून गुजरातचे राज्यपाल म्हणून काम करत आहेत. त्याआधी त्यांनी हिमाचल प्रदेशच्या राज्यपालपदाची जबाबदारी सांभाळली होती.
