आर्यन खान ड्रग्ज प्रकरणात सर्वात मोठी कारवाई; NCBचे ते दोन अधिकारी निलंबित
मुंबई |
अभिनेता शाहरुख खान याचा मुलगा आर्यन खान याच्याशी संबंधित कॉर्डेलिया क्रूझ ड्रग्ज प्रकरणातील दोन तपास अधिकाऱ्यांवर नार्कोटिक्स कंट्रोल ब्युरो अर्थात एनसीबीने निलंबनाची कारवाई केली आहे. हा आदेश तत्काळ प्रभावाने लागू करण्याची सूचना देण्यात आली आहे. दरम्यान, आर्यन खान ड्रग्ज प्रकरणाचा तपास अनेक कारणांनी चर्चेत राहिला होता. एनसीबीच्या कार्यपद्धतीवर प्रश्नचिन्ह उपस्थित करण्यात आले होते. त्यामुळेच दोन तपास अधिकाऱ्यांवरील ही कारवाई अत्यंत महत्त्वाची ठरली आहे.
आर्यन खान ड्रग्ज प्रकरणाशी संबंधित मुख्य तपास अधिकारी तथा अधीक्षक व्ही. व्ही. सिंह आणि इंटेलीजेन्स अधिकारी आशीष रंजन प्रसाद या दोन अधिकाऱ्यांना निलंबित करण्यात आल्याची माहिती देण्यात आली आहे. तपासातील त्रुटी आणि हलगर्जीपणाचा ठपका ठेवत या दोन्ही अधिकाऱ्यांवर कारवाईचा बडगा उगारण्यात आला आहे. या कारवाईने आर्यन खान ड्रग्ज प्रकरणाशी संबंधित सर्वच अधिकाऱ्यांचे धाबे दणाणले आहेत.
दरम्यान, गेल्या ३ ऑक्टोबर रोजी एनसीबीच्या पथकाने तेव्हाचे मुंबई विभागीय संचालक समीर वानखेडे यांच्या नेतृत्वाखाली कॉर्डेलिया क्रूझवर छापा टाकला होता. या कारवाईत मोठ्या प्रमाणात ड्रग्ज सापडल्याचा दावा करत आर्यन खान याच्यासह अनेकांना ताब्यात घेण्यात आले होते. तपासानंतर या सर्वांवर अटकेची कारवाई करण्यात आली होती. एकूण १९ जणांना या प्रकरणात अटक केली गेली होती. त्यानंतर नोव्हेंबर महिन्यात आर्यन खान तसेच त्याचा मित्र अरबाज मर्चंट आणि मूनमून धमेचा यांना मुंबई हायकोर्टाने जामीन मंजूर केला. ड्रग्ज रॅकेटमध्ये सहभागी असल्याबाबत कोणताही ठोस पुरावा नसल्याच्या मुद्द्यावरून या तिघांची सुटका झाली होती.