मला लोकांसमोर नेहमी व्हिलन का केलं जातं? अजित पवारांचा थेट शरद पवारांवर निशाणा
मुंबई : उपमुख्यमंत्री अजित पवार यांच्या बंडानंतर आज मुंबईत सभा पार पडत आहे. यावेळी बोलताना अजित पवार यांनी थेट शरद पवार यांच्यावर निशाणा साधला आहे. मला लोकांसमोर नेहमी व्हिलन का केलं जातं? असं अजित पवार यांनी म्हटलं आहे.
अजित पवार म्हणाले, जर आम्हाला भाजपसोबत जायचं नव्हते तर २०१४ मध्ये मंत्रिमंडळाच्या शपथविधीला का पाठवले. २०१७ रोजी प्रदेशाध्यक्ष सुनील तटकरे, आम्ही सगळे बंगल्यावर चर्चा झाली. वरिष्टांनी सांगितले सुधीर मुनगंटीवर, देवेंद्र फडणवीस, विनोद तावडे, चंद्रकांत पाटील बैठकीत होते. कुठली खाती, पालकमंत्री पदे ठरली. निरोप आला, दिल्लीत बोलावले. वरिष्ठांसोबत बैठक झाली.
हेही वाचा – ‘आतापर्यंत सर्वात जास्त अपमान अजित पवारांचा झाला’; धनंजय मुंडे भावनिक
२५ वर्षांचा आमचा मित्रपक्ष त्याला आम्ही सोडणार नाही असं भाजपाने सांगितले. शिवसेना-राष्ट्रवादी-भाजप असे सरकार राहील असं भाजपाच्या वरिष्ठांनी सांगितले. तेव्हा शिवसेना नको, ती जातीयवादी आहे असं आमच्या वरिष्ठांनी सांगितले. त्यानंतर हे सर्व बारगळले असा गौप्यस्फोट अजित पवारांनी केला.
त्याचसोबत २०१९ मध्ये ५ बैठका एका उद्योगपतीच्या घरी झाल्या. मला आणि देवेंद्र फडणवीसांना कुठेही बोलायचे नाही हे सांगितले. पहाटेच्या शपथविधीला काय झाले हे मला अनेकदा विचारले. हे सर्व सुरू असताना अचनाक बदल झाला आणि मला शिवसेनेसोबत जायचे हे सांगितले. २०१७ मध्ये शिवसेना नको असं म्हणत होते मग अचानक २ वर्षात असा काय बदल झाला, विचारांचे अंतर असू शकते. मतमतांतरे असू शकते. नेहमी वेगवेगळी भूमिका असं चालत नाही, असंही अजित पवार म्हणाले.
