लोणावळ्यात एसीबीचा पोलीस ठाण्यामध्ये छापा, दीड लाखाच्या लाचप्रकरणी पोलीस निरीक्षक फरार
![लोणावळ्यात एसीबीचा पोलीस ठाण्यामध्ये छापा, दीड लाखाच्या लाचप्रकरणी पोलीस निरीक्षक फरार](https://mahaenews.com/wp-content/uploads/2022/05/लोणावळ्यात-एसीबीचा-पोलीस-ठाण्यामध्ये-छापा-दीड-लाखाच्या-लाचप्रकरणी-पोलीस-निरीक्षक.jpg)
पिंपरी : लोणावळा परिसरातील गॅस एजन्सीवर कारवाई न करण्यासाठी लोणावळा ग्रामीण पोलीस ठाण्यातील सहायक फौजदारासह एकाला दीड लाखांची लाच घेतल्या प्रकरणी लाचलुचपत प्रतिबंधक विभागाने अटक केली आहे. एसीबीने पोलीस ठाण्यामध्ये छापा टाकल्यानंतर पोलीस निरीक्षक घटनास्थळवरून पसार झाले आहेत. या प्रकरणी पोलीस निरीक्षक प्रवीण बाळासाहेब मोरे, सहायक फौजदार कुतबुद्दीन गुलाब खान आणि मध्यस्थी यासीन कासम शेख यांच्या विरोधात लोणावळा पोलिसात गुन्हा दाखल करण्यात आला आहे.
लोणावळा परिसरातील एका गॅस एजन्सीवर गुन्हा दाखल न करण्यासाठी सहायक पोलिस निरीक्षक कुतबुद्दीन खानने दोन लाखांची लाच मागितली होती. मात्र मध्यस्था मार्फत एजन्सीच्या मालकाने दीड लाख रुपये देण्याचे मान्य केले. याबाबत गॅस एजन्सीच्या मालकाने लाचलुचपत विभागात तक्रार दिली होती. संबंधित विभागाकडून तक्रारीची पडताळणी करण्यात आली. पोलीस निरीक्षक खानने याने आपल्या जवळील व्यक्तीला लाच घेण्यासाठी पाठवले. तेव्हा एसीबीने अगोदरच त्या ठिकाणी सापळा लावला होता. त्यानंतर पोलिस मध्यस्थी यासीन शेख याला दीड लाख रुपयांची लाच घेताना रंगेहाथ पकडले.
एसीबीने यासीन शेखची कसून चौकशी केली. त्यात सहायक फौजदार कुतबुद्दीन गुलाब खानने लाच घेण्यासाठी पाठविल्याचे उघड झाले. त्यानंतर खान आणि शेख यांना ताब्यात घेऊन अटक करण्यात आली. अधिक चौकशी केली असता लोणावळ्याचे ग्रामीण पोलीस निरीक्षक प्रवीण मोरे यांनीही लाच घेतल्याचे समोर आले. त्यानुसार मोरे यांच्यावर देखील गुन्हा दाखल करण्यात आला आहे. एसीबीच्या कारवाईनंतर पोलीस निरीक्षक प्रवीण मोरे फरार झाले आहेत. त्यांचा शोध घेण्याचे काम पोलिसांकडून सुरू आहे. अधिक तपास लोणावळा पोलीस करत आहेत.