दीनानाथ मंगेशकर रुग्णालयातील दोषींवर कठोर कारवाई केली जाईल; मुख्यमंत्री देवेंद्र फडणवीस यांचे भिसे कुटुंबीयांना आश्वासन

पिंपरी : शहरातील दीनानाथ मंगेशकर रुग्णालय प्रशासनाने पैशांच्या हव्यासापोटी उपचारात अडवणूक केल्याने तनिषा भिसे या गर्भवती महिलेला जीव गमावावा लागला. या घटनेनंतर संपूर्ण राज्यातून दीनानाथ मंगेशकर रुग्णालयाविरोधात संताप व्यक्त केला जातोय. मुख्यमंत्री देवेंद्र फडणवीस यांनी या प्रकरणाची दखल घेत समितीही नेमली आहे. आज देवेंद्र फडणवीस यांनी भिसे यांच्या कुटुंबीयांची बालेवाडी येथे भेट घेतली. यावेळी आमदार अमित गोरखे, गृहराज्यमंत्री योगेश कदम उपस्थित होते.

याप्रसंगी दीनानाथ मंगेशकर रुग्णालयातील दोषींवर कठोर कारवाई केली जाईल, असे आश्वासन मुख्यमंत्र्यांनी दिले आहे. त्यानंतर त्यांनी माध्यमांशी संवाद साधला. कालचा प्रकार हा असंवेदनशील होता. जिथे चूक आहे, तिथे चूक म्हणावं लागेल, असे म्हणत फडणवीस यांनी दीनानाथ मंगेशकर रुग्णालयाबाबत प्रतिक्रिया दिली आहे.

हेही वाचा –  महापालिका उभारणार पाच काेटींची ‘क्लायम्बिंग वॉल’

फडणवीस म्हणाले, रुग्णालयाला त्यांची चूक सुधारावी लागेल. ते ही चूक सुधारण्यासाठी प्रयत्न करणार असतील तर आम्हाला आनंद आहे. मी नेमलेल्या समितीचा जोपर्यंत अहवाल येत नाही. तोपर्यंत आता तरी बोलणे योग्य ठरणार नसल्याचे त्यांनी यावेळी सांगितले आहे. हॉस्पिटलबाहेर सातत्याने विविध पक्ष, संघटना आंदोलन करत आहेत. त्याबाबत बोलताना फडणवीस म्हणाले, रुग्णालयाबाहेर आंदोलन करणे योग्य नाही. शो बाजी बंद झाली पाहिजे. घैसास यांच्या रुग्णालयाची झालेली तोडफोड समर्थनीय नाही. त्यामध्ये भाजपची महिला आघाडी सहभागी असेल तरी हे कृत्य चुकीचे आहे.

दीनानाथ मंगेशकर हे रुग्णालय लतादीदी आणि मंगेशकर परिवाराने खूप मेहनतीने उभारले आहे. हे रुग्णालय अत्यंत नावाजलेले आहे. या रुग्णालयात अनेक शस्त्रक्रिया आणि उपचार होतात. अशा घटना रुग्णालयात घडणे चुकीचे आहे. याबाबत दीनानाथ मंगेशकर रुग्णालयातील दोषींवर कठोर कारवाई केली जाईल, असे आश्वासन मुख्यमंत्र्यांनी दिले आहे.

महाईन्यूज-X वर फॉलो करा : महाईन्यूजला instagram वर फॉलो करा