शिक्षण विश्व: भोंडल्याचा उत्साह, विद्यार्थ्यांनी धरला ठेका!
प्रतिभा शिक्षण शास्त्र महाविद्यालयात भोंडला आणि दांडियाचे आयोजन
पिंपरी-चिंचवड: प्रतिभा ग्रुप ऑफ इन्स्टिट्यूट अंतर्गत कार्यरत असलेल्या प्रतिभा शिक्षण शास्त्र महाविद्यालयाच्या बीएड विभागात पारंपरिक उत्सवाचे औचित्य साधून भोंडला आणि दांडियाचा रंगतदार कार्यक्रम नुकताच संपन्न झाला. या कार्यक्रमाला विद्यार्थ्यांचा उत्स्फूर्त प्रतिसाद लाभला असून प्राध्यापक, विद्यार्थी आणि विद्यार्थिनींनी मोठ्या संख्येने सहभाग नोंदवला.
कार्यक्रमाची सुरुवात महाविद्यालयाच्या प्राचार्या डॉ. पौर्णिमा कदम यांच्या हस्ते गजलक्ष्मी प्रतिमेची पूजा करून करण्यात आली. त्यानंतर पारंपरिक भोंडल्याची गाणी गात विद्यार्थ्यांनी आनंदाने फेर धरला. सांस्कृतिक वातावरणात भर घालत संगीताच्या तालावर साऱ्यांनी रंगतदार दांडिया खेळाचा आनंद लुटला. कार्यक्रमाच्या शेवटी सर्व सहभागी विद्यार्थ्यांना खिरापत वाटण्यात आली.
या प्रसंगी डॉ. पौर्णिमा कदम यांनी उपस्थितांना विजयादशमीच्या शुभेच्छा दिल्या. कार्यक्रम यशस्वी करण्यासाठी संस्था सचिव डॉ. दीपक शहा, खजिनदार डॉ. भूपाली शहा आणि संचालिका डॉ. तेजल शहा यांचे मोलाचे मार्गदर्शन आणि सहकार्य लाभल्याचे त्यांनी सांगितले.
कार्यक्रमाचे प्रास्ताविक सांस्कृतिक विभाग प्रमुख प्रा. पल्लवी चव्हाण यांनी केले. प्रा. गीता कांबळे यांनी उत्कृष्ट सूत्रसंचालन केले तर डॉ. सुवर्णा गायकवाड यांनी आभार मानून कार्यक्रमाची सांगता केली.
