“खडकवासल्याच्या निसर्ग साक्षीने रंगला आठवणींचा मेळा”
शिक्षण विश्व: महात्मा फुले कॉलेज माजी विद्यार्थ्यांचा उत्साही स्नेहमेळावा
पिंपरी-चिंचवड | पुणे जिल्ह्यातील खडकवासला येथील निसर्गरम्य पालवी रिसॉर्ट येथे पिंपरीतील महात्मा फुले कॉलेज कला विकास विद्यार्थी मंच यांच्या वतीने आयोजित माजी विद्यार्थ्यांचा स्नेहमेळावा अत्यंत उत्साहात आणि आनंददायी वातावरणात पार पडला. विविध क्षेत्रात कार्यरत असलेले माजी विद्यार्थी या निमित्ताने एकत्र आले आणि जुन्या आठवणींना उजाळा देत मैत्रीचे बंध अधिक दृढ केले.
निसर्गाच्या सान्निध्यात भरलेल्या या मेळाव्यामुळे कार्यक्रमाला विशेष रंगत आली. अनेक वर्षांनी एकमेकांना भेटलेल्या मित्रमैत्रिणींनी कॉलेजमधील दिवस, कट्ट्यावरच्या गप्पा, वर्गातील किस्से आणि विविध उपक्रमांच्या आठवणींना उजाळा दिला. “कॉलेज सोडून कितीही वर्षे झाली तरी त्या आठवणी मनात कायम ताज्याच राहतात,” अशी भावना उपस्थितांनी व्यक्त केली.
हेही वाचा : सुनेत्रा काकींना विक्रमी मताधिक्याने निवडून द्या; रोहित पवारांचे बारामतीकरांना भावनिक आवाहन
या स्नेहमेळाव्यात आजी-माजी विद्यार्थ्यांमध्ये विचारांची देवाण-घेवाण झाली. अनुभवी माजी विद्यार्थ्यांनी आपल्या कार्यक्षेत्रातील अनुभव सांगत नव्या पिढीला मार्गदर्शन केले, तर नव्या विद्यार्थ्यांनीही उत्साहाने सहभाग घेतला. हास्यकल्लोळ, जुन्या आठवणींवरील चर्चा आणि मैत्रीच्या आठवणींनी संपूर्ण वातावरण भारावून गेले.
कार्यक्रमादरम्यान विविध मनोरंजनात्मक खेळ व उपक्रमांचे आयोजन करण्यात आले होते. सहभागींच्या उत्स्फूर्त प्रतिसादामुळे कार्यक्रम अधिक रंगतदार बनला. प्रत्येकाने मनमोकळेपणाने सहभाग घेतल्यामुळे स्नेहमेळावा संस्मरणीय ठरला.
या प्रसंगी समीर आबनावे, लीना माने आणि शर्मिला डोंगरे यांनी मनोगत व्यक्त करत आपल्या कॉलेज जीवनातील आठवणींना उजाळा दिला. कार्यक्रमाचे प्रास्ताविक विठ्ठल अहिरे यांनी केले, तर सूत्रसंचालन गणेश मोकाटे आणि भरत पवार यांनी प्रभावीपणे पार पाडले.
महात्मा फुले कॉलेज कला विकास विद्यार्थी मंच यांनी या स्नेहमेळाव्याचे नियोजन उत्कृष्टरीत्या केले. या उपक्रमामुळे माजी विद्यार्थ्यांमध्ये पुन्हा एकदा एकोप्याची भावना दृढ झाली असून, महाविद्यालयाशी असलेले नाते अधिक घट्ट झाले.
