पिंपरी |महाईन्यूज|प्रतिनिधी|
‘शिव भोजन योजने’अंतर्गत दहा रुपयांत जेवणाची थाळी मिळण्यास २६ जानेवारीपासून सुरुवात होणार असून, त्यासाठी पुण्यातील सात आणि पिंपरी चिंचवडमधील चार अशी ११ ठिकाणे निवडण्यात आली आहेत. ही योजना गरीब आणि गरजूंसाठी असली, तरी गरीब कोण हे तपासणे अवघड असल्याने ही थाळी ‘प्रथम येणाऱ्यास प्रथम प्राधान्य’ या तत्त्वावर प्रत्येक केंद्रात १५० लोकांना मिळणार आहे. थाळीचा लाभ घेणाऱ्यांचे फोटो काढून ते दररोज केंद्रचालकांकडून जिल्हा प्रशासनाकडे पाठविले जाणार असून, ‘महा अन्नपूर्णा अॅप’वर ही माहिती संकलित होणार आहे.
राज्यात शिव भोजन योजना राबविण्यात येणार असून, या योजनेंतर्गत राज्यातील नागरिकांना अवघ्या दहा रुपयांत जेवणाची थाळी देण्यात येणार असल्याची घोषणा मुख्यमंत्री उद्धव ठाकरे यांनी नागपूर अधिवेशनात केली होती. २६ जानेवारीपासून या योजनेला आरंभ होणार आहे. या पार्श्वभूमीवर राज्याचे अन्न व नागरी पुरवठा मंत्री छगन भुजबळ यांनी व्हिडिओ कॉन्फरन्सिंगद्वारे संबंधित अधिकाऱ्यांशी संवाद साधला. त्यामध्ये थाळीचा लाभ घेण्यासाठी येणारी व्यक्ती ही गरीब आणि गरजू आहे का, हे तपासणे शक्य नसल्याने ‘प्रथम येणाऱ्यास प्रथम प्राधान्य’ या तत्त्वावर लाभ देण्याच्या सूचना देण्यात आल्या आहेत. प्रत्येक केंद्रामध्ये १५० लोकांनाच दुपारी १२ ते दोन या वेळेत हा लाभ मिळणार असल्याचे जिल्हा प्रशासनाकडून सांगण्यात आले.
शिवभोजन योजनेंतर्गत मिळणाऱ्या थाळीमध्ये ३० ग्रॅमच्या दोन चपात्या, १०० ग्रॅम भाजी, १०० ग्रॅम भात, १०० ग्रॅम वरण मिळणार आहे. प्रत्येक केंद्राला १५० लोकांनाच थाळी देण्याचे बंधन घालण्यात आले आहे.
प्रत्येकाचा काढला जाणार फोटो
‘या योजनेचा लाभ घेणाऱ्या १५० लोकांचे फोटो केंद्र चालकांकडून काढण्यात येणार आहेत. ते फोटो ‘महा अन्नपूर्णा अॅप’वर केंद्र चालकांकडून डाउनलोड केले जाणार आहेत. त्यावरून प्रत्येक केंद्रामध्ये दररोज किती लोकांनी लाभ घेतला, याची माहिती संकलित होणार आहे. दररोज १५० लोकांचे फोटो डाउनलोड केल्यानंतर अॅप आपोआप लॉक होणार आहे,’ असे शहर अन्नधान्य वितरण अधिकारी अस्मिता मोरे यांनी सांगितले. एका व्यक्तीला एकच थाळी मिळणार आहे. केंद्र चालकांना राज्य सरकारकडून प्रत्येक थाळीमागे ४० रुपये अनुदान मिळणार असून, दहा रुपये ग्राहकाकडून घेतले जाणार आहेत. अनुदानापोटी सुमारे ५४ लाख रुपये प्राप्त झाले आहेत, असे मोरे यांनी स्पष्ट केले.
पुण्यात सात आणि पिंपरी चिंचवडमध्ये चार अशी ११ ठिकाणे शिव भोजन थाळीसाठी निवडण्यात आली आहेत. पुणे महापालिकेच्या आवारातील निशिगंधा हॉटेलमध्ये असलेल्या केंद्राचे उद्घाटन २६ जानेवारीला राज्याचे उपमुख्यमंत्री अजित पवार यांच्या हस्ते करण्यात येणार आहे. प्रत्येक केंद्रामध्ये १५० लोकांना या योजनेचा लाभ मिळणार आहे. – अस्मिता मोरे, शहर अन्नधान्य वितरण अधिकारी
येथे मिळेल शिव भोजन थाळी
- पुणे महानगपालिकेतील हॉटेल निशिगंधा
- कौटुंबिक न्यायालयातील कँटीन
- कात्रज कॉर्नर येथील ‘जेएसपीएम’चे कँटीन
- स्वारगेट एसटी स्थानक
- गुलटेकडी मार्केट यार्डमधील हॉटेल समाधान (गाळा क्रमांक ११)
- महात्मा फुले मंडई
- हडपसर गाडीतळ येथील शिवसमर्थ भोजनालय
- पिंपरी चिंचवड महापालिकेचे कँटीन
- यशवंतराव चव्हाण रुग्णालयाचे कँटीन
- वल्लभनगर एसटी बस स्थानक
- पिंपरी चिंचवड नवनगर प्राधिकरण येथील कँटीन
