मुख्यमंत्र्यांच्या मर्जीतील असलेल्या श्रावण हर्डिकरांकडे ‘पीएमआरडीए’चा अतिरिक्त पदभार
पिंपरी ( महा ई न्यूज ) – पुणे महानगर प्रदेश विकास प्राधिकरणाच्या (पीएमआरडीए) अध्यक्षपदाचा अतिरिक्त कार्यभार पिंपरी-चिंचवड महापालिकेचे आयुक्त श्रावण हर्डीकर यांच्याकडे सोपविण्यात आला आहे. ही नियुक्ती तात्पुरत्या स्वरुपात असल्याचे हर्डीकर यांनी स्पष्ट केले आहे.
‘पीएमआरडीए’चे अध्यक्ष किरण गित्ते पाच वर्षांसाठी राज्यात प्रतिनियुक्तीवर आले होते. त्याचा कालखंड पूर्ण होत आल्याने त्यांच्या जागी हर्डीकर यांची निवड होणार असल्याची चर्चा होती. त्यावर तात्पुरत्या स्वरुपात का होईना शिक्कामोर्तब झाले आहे. वास्तविक, ‘पीएमआरडीए’च्या स्थापनेनंतर पहिल्या आयुक्तपदाची धुरा महेश झगडे यांनी सांभाळली. त्यांची बदली झाल्यानंतर राज्याच्या महिला आणि बालकल्याण मंत्री पंकजा मुंडे यांचे निकटवर्तीय गित्ते यांची नियुक्ती झाली होती. गित्ते त्रिपुरा केडरचे अधिकारी असून, ते महाराष्ट्र केडरमध्ये २०१४मध्ये प्रतिनियुक्तीवर आले. त्यानंतर मे २०१७ मध्ये त्यांनी अध्यक्षपदाची जबाबदारी सांभाळली. त्यांनी ‘पीएमआरडीए’चा एकात्मिक आराखडा तयार केला आहे. तसेच, हिंजवडी पुणे मेट्रोची पायाभरणीच्या कामाचाही प्रारंभ त्यांच्याच कारकिर्दीत झाला.
नागपूरहून पिंपरी-चिंचवड महापालिकेत आलेल्या हर्डीकर यांनी आयुक्तपदाचा कार्यभार मार्च २०१७ मध्ये स्वीकारला. ते मुख्यमंत्री देवेंद्र फडणवीस याच्या मर्जीतील आहेत, अशी टीकाही त्यांच्यावर झाली. परंतु, स्मार्ट सिटी, अमृत, पंतप्रधान आवास आदी योजनांना गती देण्याचे काम त्यांनी केले आहे. त्यामुळे महापालिकेचे आयुक्तपद कायम ठेवून ‘पीएमआरडीए’चा अतिरिक्त कार्यभार कायमस्वरूपी त्यांच्याकडे देणार किंवा त्यांच्याजागी नवे आयुक्त येणार, हे प्रश्न अनुत्तरीत आहेत.
