ब्रम्हाकुमारी डॉ. दादी रतनमोहिनी यांच्या सत्कारातून पुण्यकर्म करण्याची प्रेरणा मिळणार – आमदार जगताप
पिंपरी | महाईन्यूज | प्रतिनिधी
दादींच आपल्या शहरात झालेले आगमन व पिंपरी-चिंचवड महापालिकेने केलेल्या ब्रम्हाकुमारी राजयोगिनी डॉ. दादी रतनमोहिनी यांच्या सत्कारामधून शहरवासियांना पुण्यकर्म करण्याची नक्कीच प्रेरणा मिळणार आहे, असे मत आमदार लक्ष्मण जगताप यांनी व्यक्‍त केले.
पिंपरी-चिंचवड महापालिकेच्या वतीने बालाजी लॉन्स काळेवाडी येथे ब्रम्हाकुमारी राजयोगिनी डॉ. दादी रतनमोहिनी यांना त्याच्याहस्ते मानपत्र देवून सन्मानित करण्यात आले, त्यावेळी ते बोलत होते. महापौर उषा उर्फ माई ढोरे यांच्या अध्यक्षतेखाली झालेल्या या कार्यक्रमास नगरसदस्य संतोष कोकणे, संदिप वाघेरे, सागर आंगोळकर, नगरसदस्या निता पाडाळे, माजी उपमहापौर प्रभाकर वाघेरे, माजी नगरसदस्या गिरिजा कुदळे, जवाहर कोटवाणी प्रभागाचे नामनिर्देशित सदस्य संतोष ढोरे, प्रबोधनकार शारदा मुंढे, ब्रम्हाकुमारी सुरेखा दिदी, पारु दिदी, उर्मिला दिदी, उषा दिदी, लिला दिदी व बहुसंख्येने साधक व शहरवासीय नागरिक उपस्थित होते.
यावेळी ब्रम्हाकुमारी राजयोगिनी डॉ. दादी रतनमोहिनी म्हणाल्या जे काही आपण चांगल ऐकतो, आत्मसात करतो त्याचप्रमाणे आपले जीवन व्यथित होत असते. आपल्या मनाच्या गाभा-यामध्ये आध्यात्मिक विचार असला पाहिजे. त्याकरीता आपण सर्वांनी ध्यानधारणा करावी, असेही त्या म्हणाल्या.
आमदार लक्ष्मण जगताप म्हणाले की, पिंपरी चिंचवड नगरी ही कष्टक-यांची नगरी म्हणून ओळखली जाते. या कष्टक-यांच्या नगरीमध्ये जगद्गुरु तुकाराम महाराज, संतश्रेष्ठ ज्ञानेश्वर महाराज, छत्रपती शिवराय व मोरया गोसावी यांच्या विचारांचा वसा जोपासला जातो. आज शहरवासीयांच्या वतीने पण दादींचा सत्कार केल्याने ख-या अर्थाने आज संपुर्ण शहरवासीयांचा गौरव झालेला आहे, असेही ते म्हणाले.
महापौर उषा उर्फ माई ढोरे यावेळी म्हणाल्या संत मंडळी जीवनाची दिशा दाखविण्याचे महंत कार्य करीत असतात. पिंपरी-चिंचवड शहर ही संतांच्या विचारांची भूमी आहे. आणि ही भूमी संतांचीच असल्याचे काम शहरवासीयांकडून होत असते, असेही त्या म्हणाल्या.
मानपत्राचे वाचन जनसंपर्क अधिकारी रमेश भोसले यांनी केले. सुत्रसंचालन संजय शिंदे यांनी केले. तर आभार अनुप पाटील यांनी मांनले.
