पिंपळे गुरवमध्ये पार्किंगवरुन तुंबळ हाणामारी, एकमेकांच्या विरोधात तक्रार
![Shocking! A gang robbery on Tapari saying ‘Give me installments ... I am a brother here’ ...](https://mahaenews.com/wp-content/uploads/2019/03/Crime.jpg)
पिंपरी ( महा ई न्यूज ) – पार्किंगच्या कारणावरून दोन कुटुंबांमध्ये तुंबळ हाणामारी झाली. याप्रकरणी दोन्ही कुटुंबांनी एकमेकांच्या विरोधात तक्रार दाखल केली आहे. ही घटना रविवारी (दि. ३) रात्री पावणेबाराच्या सुमारास जवळकरनगर पिंपळे गुरव येथे घडली.
हरिष प्रकाश पिल्ले (वय ३९, रा. जवळकरनगर, पिंपळे गुरव) यांनी याप्रकरणी फिर्याद दिली. त्यानुसार सागर आनंदा रसाळ (वय २९), आनंदा हरिभाऊ रसाळ (वय ५२), नीलम आनंदा रसाळ (वय ५०, तिघे रा. जवळकरनगर, पिंपळे गुरव) यांच्या विरोधात सांगवी पोलीस ठाण्यात गुन्हा दाखल करण्यात आला आहे.
पिल्ले यांनी दिलेल्या फिर्यादीनुसार, पिल्ले हे त्यांच्या नेहमीच्या जागेवर कार पार्क करीत असताना आरोपी सागरने त्यांना हटकले. त्यांच्यात पार्किगच्या जागेवरून वाद सुरु झाला. या वादातूनच आरोपींनी आपसात संगनमत करून पिल्ले यांना मारहाण करण्यास सुरुवात केली. यावेळी पिल्ले यांच्या आई मध्यस्थी करण्यासाठी आल्या असता त्यांना देखील आरोपींनी मारहाण केली. याबाबत गुन्हा दाखल करण्यात आला आहे.
याच्या परस्पर विरोधात सागर आनंदा रसाळ यांनी फिर्याद दिली. त्यानुसार हरीश प्रकाश पिल्ले, रमनी प्रकाश पिल्ले (वय ५९, रा. जवळकरनगर, पिंपळे गुरव) यांच्या विरोधात गुन्हा दाखल करण्यात आला आहे.
रसाळ यांनी दिलेल्या फिर्यादीनुसार, हरीश पिल्ले याने रसाळ यांची अॅक्टिव्हा दुचाकी खाली पाडली. याचा रसाळ यांनी पिल्ले याला जाब विचारला. त्यावरून पिल्ले याने रसाळ यांना शिवीगाळ करून ‘तुझ्याकडे पाहून घेईन’ अशी धमकी दिली. यावेळी रसाळ यांच्या आई मध्यस्थी करण्यासाठी आल्या असता पिल्ले याच्या आईने त्यांना मारहाण केली. तसेच रसाळ यांच्या डोक्यात दगड मारून जखमी करत वडिलांना देखील मारहाण केली. याबाबत गुन्हा दाखल करण्यात आला आहे. सांगवी पोलीस तपास करत आहेत.