पिंपरी, ( महा ई न्यूज ) – नागरिकांना पोलिसांशी सोशल मीडियाच्या माध्यमातून संपर्क साधता यावा, यासाठी पिंपरी-चिंचवड पोलिसांनी ‘ट्विटर’ अकाउंट सुरू केले आहे. पोलिसांचे उपक्रम, आवाहन आणि सूचना नागरिकांपर्यंत पोहोचाव्यात यासाठी या ट्विटर अकाउंटचा वापर केला जाणार आहे.
नागरिक आणि पोलिस खाते यामधील दरी कमी व्हावी, यासाठी पोलिस आयुक्त आर. के. पद्मनाभन हे विविध उपक्रम राबवित आहेत. पोलीस आणि नागरिक यांच्यामधील संवाद वाढावा, यासाठी अनेक उपक्रम सुरू करण्यात आले आहे. नागरिकांना आपल्या तक्रारी, सूचना पोलिसांकडे तातडीने मांडता याव्यात, यासाठी आता पोलिस आयुक्तालयाने ट्विटर अकाउंट सुरू केले आहे. Pimpri Chinchwad Police असे ट्विटर अकाउंटच्या प्रोफाइलवरील नाव आहे. @PCcityPolice या नावाने नवीन ट्विटर अकाउंट सुरू करण्यात आले आहे. पोलिसांच्या कामकाजाची व कामगिरीची माहिती नागरिकांना मिळावी, हा या मागचा उद्देश आहे. पोलिस आयुक्त आर. के. पद्मनाभन, अप्पर पोलिस आयुक्त रामनाथ पोकळे, सहायक पोलिस आयुक्त श्रीधर जाधव यांच्या मार्गदर्शनाखाली हे अकाउंट सुरू करण्यात आले आहे. नागरिकांनी या सुविधेचा फायदा घ्यावा, असे आवाहन पोलिसांनी केले आहे.
