न्यू सिटीप्राईड इंग्लिश मीडियम शाळेत सावित्रीबाई फुले जयंती साजरी
पिंपरी / महाईन्यूज
क्रांतिसूर्य महात्मा ज्योतिबा फुले एज्युकेशन फाऊंडेशन संचालित न्यू सिटीप्राईड इंग्लिश मिडीयम स्कूल यांच्या वतीने क्रांतीज्योती सावित्रीबाई फुले जयंती सोशल डिस्टंसिन्ग पाळून साजरी करण्यात आली. सावित्रीबाई फुले यांच्या प्रतिमेस महिला व बालविकास कल्याण समिती सभापती निर्मला कुटे यांच्या हस्ते पुष्पहार अर्पण करून अभिवादन करण्यात आले.
यावेळी संस्थेचे संस्थापक अरुण चाबूकस्वार, मुख्याध्यापिका कल्पलता डिक्रुझ, कैलास बडगुजर(उद्योजक),रोहिणी बडगुजर, युवराज प्रगणे, राजेश गायकवाड तसेच शिक्षक, शिक्षकेत्तर कर्मचारी उपस्थित होते.
संस्थेचे संस्थापक अरुण चाबुकस्वार म्हणाले की, “ज्योतिराव फुलेंसारख्या महावृक्षाच्या सावलीत सावित्रीबाईंची वाढ तेजाने बहरली. स्त्रीने ठरविले तर तिच्यासाठी काहीही अशक्य नाही, याचे मूर्तिमंत उदाहरण म्हणजे सावित्रीबाई फुले होय. सावित्रीबाई धाडसाचा पर्वत होत्या. त्यांनी ज्योतिराव फुलेंच्या निधनानंतरही सत्यशोधक समाजाचे कार्य आपल्या अंतापर्यंत सुरु ठेवले. आयुष्यातील सर्व संकटांना त्यांनी निर्धाराने हरविले. सावित्रीबाईंच्या त्यागाची महिलांनी जाण ठेवावी”.
महाराष्ट्र शासनातर्फे यावर्षी पासून ३ जानेवारी -सावित्रीबाई फुले जयंती हा दिवस महिला शिक्षण दिन म्हणून साजरा करण्याचा निर्णय जाहीर झाला आहे, म्हणून “सावित्री उत्सव”शाळेत साजरा केला. शाळेमध्ये ऑनलाईन पद्धतीने निबंध स्पर्धा, वक्तृत्व स्पर्धा, चित्रकला स्पर्धा आयोजित करण्यात आल्या होत्या. यावेळी सर्व शिक्षकांचे प्रमुख मान्यवरांच्या हस्ते पुष्पगुच्छ देऊन स्वागत करण्यात आले.
त्याचबरोबर शाळेतील शिक्षकांनी देखील आपले मनोगत व्यक्त केले. उत्कर्षा पाटील यांनी सूत्रसंचालन केले. शारदा थोरात यांनी पाहुण्याचे आभार मानले.
