मोठी बातमी! माजी गृहमंत्री अनिल देशमुखांचा ताबा आता सीबीआयकडे!
![Big news! Former Home Minister Anil Deshmukh now in CBI custody!](https://mahaenews.com/wp-content/uploads/2022/04/मोठी-बातमी-माजी-गृहमंत्री-अनिल-देशमुखांचा-ताबा-आता-सीबीआयकडे.jpg)
मुंबईः माजी गृहमंत्री व राष्ट्रवादी काँग्रेसचे नेते अनिल देशमुख (Anil Deshmukh) यांना मोठा झटका बसला आहे. अनिल देशमुख यांचा ताबा आता सीबीआयकडे देण्यात आला आहे. आर्थर रोड तुरुंगातून आता सीबीआयने ताबा घेतला आहे. तसंच, देशमुखांची सीबीआय कोठडी मिळवण्यासाठी त्यांना कोर्टात हजर केले जाणार आहे.
‘ईडी’कडून पैशांच्या गैरव्यवहाराचा तपास सुरू असतानाच सीबीआयला मूळ १०० कोटी रुपयांच्या खंडणी वसुलीच्या आरोपाचा तपास करायचा आहे. यासाठी सीबीआयला अनिल देशमुख यांचा ताबा हवा होता. विशेष पीएमएलए न्यायालयाने सीबीआयला तशी परवानगी दिली होती. त्यानुसार आज सीबीआयने अनिल देशमुख यांचा अधिकृतपणे ताबा घेतला आहे.
ताबा देण्याच्या सीबीआय कोर्टाच्या आदेशाला आव्हान देणारी याचिकाही देशमुख यांनी मुंबई हायकोर्टात दाखल केली होती. अनिल देशमुख यांना थोड्याच वेळात सेशन्स कोर्टात विशेष सीबीआय कोर्टात हजर केले जाण्याची शक्यता आहे. अनिल देशमुख यांना कालच जे.जे रुग्णालयातून डिस्चार्ज देण्यात आला आहे. त्यानंतर लगेचच सीबीआयने अनिल देशमुख यांचा ताबा घेतला आहे. ऑर्थर रोड तुरुंगातून सीबीआयने ताबा घेतला आहे.
काय आहे प्रकरण?
गृहमंत्रिपदी असताना अनिल देशमुख यांनी शंभर कोटी रुपये खंडणी मागितल्याचा आरोप तत्कालीन पोलिस आयुक्त परमबीरसिंह यांनी केला होता. त्यांच्या याचिकेवर उच्च न्यायालयाने हा तपास सीबीआयकडे सोपवला. त्याचदरम्यान देशमुख यांनी पैशांचा गैरव्यवहार केल्याच्या आरोपाखाली ‘ईडी’ने अनिल देशमुख यांच्यासह त्यांचे स्वीय सचिव कुंदन शिंदे व संजीव पलांडे यांना अटक केली. ‘ईडी’कडून पैशांच्या गैरव्यवहाराचा तपास सुरू असतानाच सीबीआयला मूळ १०० कोटी रुपयांच्या खंडणी वसुलीच्या आरोपाचा तपास करायचा आहे.