तरुणींच्या अंघोळीचे मोबाईलमध्ये शुटिंग; अल्पवयीन मुलाचं संतापजनक कृत्य
रत्नागिरी |कमी वयात एखादं तंत्रज्ञान हाती लागल्यास त्याचा चुकीचा वापर होण्याचा धोका अधिक असतो. रत्नागिरी जिल्ह्यातील राजापूर तालुक्यातही असाच काहीसा प्रकार समोर आला आहे. मामाच्या गावी आलेल्या तरुणी अंघोळ करत असताना अल्पवयीन तरुणाने मोबाईल कॅमेऱ्याद्वारे त्यांचं चित्रण केल्याची धक्कादायक घटना घडली आहे. याप्रकरणी पीडित तरुणींच्या कुटुंबियांनी दिलेल्या फिर्यादीनंतर पोलिसांनी अल्पवयीन आरोपीविरोधात गुन्हा दाखल केला आहे.
मिळालेल्या माहितीनुसार, मूळ सिंधुदुर्ग जिल्ह्यातील आणि सध्या नोकरीनिमित्त मुंबईला वास्तव्यास असणारी तरूणी कुटुंबासह आपल्या मामाच्या घरी उन्हाळी सुट्टीत राहण्यासाठी आली हाती. तरुणीच्या मामाचे घर साधे असून बाथरूमही कमी उंचीचे कौलारू आहे. २५ मे रोजी सकाळी सदर तरूणी मावशीच्या मुलींसह अंघोळीसाठी गेली असता, बाथरूमची भिंत आणि छप्पर यांच्यामध्ये असलेल्या मोकळ्या जागेत मोबाईल कॅमेरा असल्याचे तिच्या निदर्शनास आले.
अंघोळ करताना कॅमेरा दिसल्यानंतर तरुणींनी जोरजोरात आरडाओरड केली. त्यानंतर तेथे जवळ लपून बसलेल्या तरुणाला ताब्यात घेण्यात आलं. आरोपीच्या मोबाईलमध्ये तरुणींच्या अंघोळीचे व्हिडिओ असल्याचं आढळले. त्यानंतर हे व्हिडिओ डिलिट करण्यात आले आहेत.
दरम्यान, या प्रकरणी गुन्हा दाखल करण्यात आला असून अधिक तपास राजपूर पोलीस करत आहेत.