एसबीआयचे कामकाज उद्या मध्यरात्री बारापर्यंत
![SBI operations till midnight tomorrow](https://mahaenews.com/wp-content/uploads/2022/03/SBI-operations-till-midnight-tomorrow.jpg)
नाशिक | प्रतिनिधी
मार्चअखेरमुळे गुरुवारी (दि. ३१) रोजी मध्यरात्री बारा वाजेपर्यंत ट्रेझरीसह जिल्ह्यातील स्टेट बँक ऑफ इंडियाच्या शाखा सुरू ठेवण्याचे आदेश जिल्हाधिकारी गंगाथरन डी. यांनी काढले आहेत. या दिवशी सायंकाळनंतरही बँका सुरूच राहणार असल्याने सरकारी यंत्रणांची गैरसोय टळणार आहे.
सरकारी कार्यालयांमध्ये सध्या मार्चअखेरमुळे आर्थिक ताळेबंदाची लगबग सुरू आहे. वित्तीय वर्षात प्राप्त झालेल्या अनुदानाचा हिशेब त्याच आर्थिक वर्षात पूर्ण करण्याची संबंधित सरकारी यंत्रणांची जबाबदारी असते. जिल्हा कोशागार व तालुका उपकोशागार कार्यालयामधून वितरित होणारी देयके, धनादेशाद्वारे रक्कम काढणे, महसुली उत्पन्नाच्या रकमा शासनाकडे भराव्यात यासाठी पुरेसा अवधी मिळणे गरजेचे आहे. त्याकरिता जिल्ह्यातील ट्रेझरी शाखेसह स्टेट बँकेच्या अन्य शाखा मार्चअखेरीस म्हणजेच ३१ मार्च रोजी मध्यरात्री बारा वाजेपर्यंत खुली ठेवण्याचे आदेश जिल्हाधिकाऱ्यांनी काढले आहेत. त्यानुसार जिल्हाधिकारी कार्यालयातील एसबीआयची कोशागार शाखा, नाशिकरोड, देवळाली कॅम्प, तसेच तालुका मुख्यालयाच्या ठिकाणी असलेल्या स्टेट बँकेच्या शाखा सुरू राहणार आहेत. याशिवाय सुरगाण्यातील देना बँकेच्या शाखेतदेखील मध्यरात्री बारापर्यंत कामकाज सुरू राहणार आहे.