आमदार बबन लोणीकरांच्या घरावर शेण फेकले: गुन्हा दाखल करण्याची संतप्त युवक काँग्रेस कार्यकर्त्यांची मागणी

मागासवर्गीय समाजाबद्दल अपशब्द वापरणाऱ्या लोणीकर यांच्यावर अ‍ॅट्रॉसिटी कायद्यानुसार कारवाई करावी, अशी मागणी रिपब्लिकन पार्टी ऑफ इंडिया आणि काँग्रेस कमिटी अनुसूचित जाती विभागाने केली आहे. तर, युवक काँग्रेसच्या कार्यकर्त्यांनी लोणीकर यांच्या घरावर ‘शेण फेको’ आंदोलन करीत लोणीकरांचा निषेध केला. थकीत वीजबिलाचा वाद चिघळल्याने लोणीकर यांनी दोन्ही घरांचे लाईट बील आज (३१ मार्च) भरले. (youth congress activists throw dung at mla baban lonikars house)

आमदार बबनराव लोणीकर यांचे औरंगाबाद शहरातील आलोकनगर भागात निवासस्थान आहे. त्यांचा मुलगा राहुल बबनराव यादव यांच्या नावावर मार्च २०२२ अखेरीस तीन लाख २१ हजार ५७० रुपये वीजबिल थकबाकी आहे. तर अशोकनगर येथील घराचे ६७ हजार २०० रुपये वीजबिल थकीत आहे. या घराचे वीज तोडल्याचे सांगत आमदार लोणीकर यांनी सहायक अभियंता दादासाहेब काळे यांना फोनवर शिवीगाळ केल्याचा आरोप आहे. क्लिपमधील आवाज माझा नसल्याचा खुलासा लोणीकर यांनी केला आहे. मात्र, लोणीकरांच्या कथित ध्वनीफितीतील अपशब्दांवर आंबेडकरी संघटनांनी आक्षेप घेतला आहे. काँग्रेस कमिटी अनुसूचित जाती विभागाने गुरुवारी जिल्हाधिकारी सुनील चव्हाण यांना निवेदन देऊन लोणीकर यांच्यावर गुन्हा दाखल करण्याची मागणी केली. लोणीकर यांनी वीज बिलाबाबत महावितरण कर्मचाऱ्याला धमकी देऊन लोकशाहीच्या नियमांची पायमल्ली केली आहे. दलित वस्तीचा जातीवाचक उच्चार केल्यामुळे त्यांच्यावर गुन्हा दाखल झाला पाहिजे, असे शहर जिल्हाध्यक्ष डॉ. अरुण शिरसाट म्हणाले.

यावेळी किशोर सरोदे, जयपाल दवणे, प्रा. शिलवंत गोपणारायन, रेखा राऊत, हरचरणसिंग गुलाटी, शकुंतला साबळे, अनिता भंडारी, प्रकाश वाघमारे, अस्मत खान, शिरीष चव्हाण, अलंकृत येवतेकर, अशोक चक्रे, गौतम इंगोले, सुनील साळवे, विजया भोसले उपस्थित होते. रिपब्लिकन पार्टी ऑफ इंडियाचे (ए) मराठवाडा युवा प्रदेशाध्यक्ष नागराज गायकवाड यांनी पोलिस आयुक्तांना निवेदन देऊन लोणीकर यांच्यावर अॅट्रॉसिटी कायद्यानुसार कारवाई करण्याची मागणी केली आहे. मागासवर्गीयांना हिणवण्याचा प्रकार निंदनीय आहे, असे गायकवाड यांनी म्हटले आहे.

दरम्यान, थकीत वीजबिलाचा वाद राज्यभर गाजल्यानंतर लोणीकर यांनी गुरुवारी दोन्ही घरांचे थकीत वीजबिल भरल्याची माहिती महावितरणने दिली आहे. आलोकनगर येथील घराचे तीन लाख २१ हजार ५०० रुपये आणि अशोकनगर येथील घराचे ६७ हजार २०० रुपये वीजबिल भरले आहे.

• ‘तोंडाला काळे फासणार’
  
  लोणीकर यांचे बेजबाबदार बोलणे महाराष्ट्र सहन करणार नाही. काँग्रेस कमिटी अनुसूचित जाती विभाग लोणीकरांच्या तोंडाला काळे फासल्याशिवाय राहणार नाही, असे डॉ. शिरसाट यांनी सांगितले. दोन वर्षांत करोनामुळे आंबेडकर जयंती साजरी करता आली नाही. यावर्षी भीमजयंतीचा उत्साह वाढतो आहे. त्यामुळे लोणीकरांच्या पोटात दुखत आहे, अशी टीका शिरसाट यांनी केली.
• घरावर शेण फेकले
  
  युवक काँग्रेसच्या कार्यकर्त्यांनी लोणीकर यांच्या सातारा परिसरातील घरावर ‘शेण फेको’ आंदोलन केले. महावितरणच्या अधिकाऱ्याला लाईट मीटर का नेले असे जाब विचारणाऱ्या लोणीकर यांनी मागासवर्गीय समाजाबद्दल अपशब्द वापरल्याच्या निषेधार्थ आंदोलन करण्यात आले, असे महाराष्ट्र प्रदेश युवक काँग्रेसचे सचिव डॉ. नीलेश आंबेवाडीकर यांनी सांगितले. या आंदोलनात अनुराग शिंदे, विजय कांबळे, गुरमित गिल, आकाश रगडे, मयूर साठे, विनोद उंटवाल सहभागी झाले.