मर्दानी! बिबट्याशी दोन हात करत आईने वाचवले मुलीचे प्राण
चंद्रपुर |
चंद्रपुरात पाच वर्षीय मुलीला वाचवण्यासाठी आईने जीवाची बाजी लावली. बिबट्याशी दोन हात करत त्याच्या जबड्यातून आपल्या पाच वर्षीय मुलीचा जीव वाचवला. चंद्रपूर शहराजवळील जुनोना गावाजवळ ही घटना घडली. अर्चना मेश्राम आपल्या ५ वर्षीय मुलीसह गावाजवळील जंगलात भाजी तोडण्यासाठी गेली होती. आई भाजी तोडत असताना मुलगी प्राजक्ता थोड्या दूर उभी होती. मात्र बिबट्याची नजर या मुलीवर पडली आणि त्याने हल्ला केला. सुरुवातीला अर्चनाला काही कळलंच नाही. बिबट्याचा सामना कसा करायचा यासाठी तिने आरडाओरड सुरु केली. मात्र जवळपास कुणीच नसल्याने अखेर तिने बिबट्याशी दोन हात करण्याचा निर्णय घेतला.
बिबट्याने मुलीचं तोंड आपल्या जबड्यात घेतलं होतं. जंगलात नेण्यासाठी प्रयत्न करत असताना तिने क्षणाचाही विलंब न करता बिबट्याशी दोन हात केले. जवळच असलेला दांडा तिने हाती घेतला आणि बिबट्यावर प्रहार करण्यास सुरुवात केली. अर्चनाचा आक्रमक बाणा पाहताच बिबट्याने मुलीला सोडून तिथून धूम ठोकली. बिबट्याच्या हल्ल्यात मुलगी जखमी झाली आहे. तिच्या चेहरा आणि डोक्यावर जखमा झाल्या. अर्चनाने शुद्ध हरपळेल्या मुलीला तात्काळ जवळच्या रुग्णालयात दाखल केले. प्राथमिक उपचारानंतर जखमी मुलीला नागपूरच्या सरकारी रुग्णालयात दाखल करण्यात आलं आहे. तिथे तिच्यावर उपचार सुरु आहेत. “माझी पत्नी अर्चनाने मोठ्या हिमतीने मुलीचा जीव वाचवला आहे. मुलीवर उपचार सुरु आहेत. मुलीच्या प्रकृतीत सुधारणा होत असल्याचं डॉक्टरांनी सांगितलं आहे, बिबट्या नेहमीच गावात बकऱ्यांची शिकार करण्यासाठी येत असतो. मात्र त्याने यावेळी माझ्या मुलीवरच हल्ला केला”, असं अर्चनाच्या पतीने सांगितलं