राज्यात पुन्हा पाऊस बरसणार
मुंबई | प्रतिनिधी
राज्यात पुन्हा एकदा पाऊस पडणार असल्याचा अंदाज हवामान खात्याने वर्तवला आहे. यावर्षी उन्हाळा, आणि हिवाळ्यातही पाऊस बरसला आहे. त्याशिवाय वर्षभरात जवळपास दर महिन्याआड पाऊस पडलाय. त्यामुळे पिकांचं मोठ्या प्रमाणात नुकसान झालं आहे.
डिसेंबर महिन्याच्या सुरुवातीलाही राज्यात पावसाच्या सरी बरसल्या होत्या. नुकतीच थंडी सुरू झाल्याने सर्वत्र तापमान खालावलं आहे. मात्र पावसामुळे काही काळासाठी थंडी कमी होणार असल्याचा अंदाज हवामान खात्याने (IMD) वर्तवला आहे. याआधी अवकाळी पावसामुळे शेतीचं मोठ्या प्रमाणात नुकसान झालं आहे. त्यासाठी भरपाई देण्याची मागणी विरोधीपक्षांनी केली आहे. सध्या काही ठिकाणी पंचनामे सुरू आहेत. ही प्रक्रिया पूर्ण झाल्यानंतर शेतकऱ्यांच्या खात्यावर थेट पैसे जमा होणार असल्याची माहिती सरकारच्या वतीने देण्यात आली.
कुठे आणि किती पाऊस होणार?
राज्यात 28 डिसेंबरला औरंगाबाद, जालना आणि मराठवाड्याच्या काही भागात पाऊस बरसणार आहे. याशिवाय राज्यातील उत्तर भागातही पाऊस होणार आहे. जळगाव, धुळे या भागात काही ठिकाणी हवामान ढगाळ राहिल. तर गोंदिया, भंडारा, वर्धा, नागपूर, अमरावती,अकोला जिल्ह्यांमध्ये विजांच्या कडकडाटासह हलका ते मध्यम स्वरुपाचा पाऊस अपेक्षित आहे.
पश्चिम महाराष्ट्रत तुरळक पाऊस होईल, असा अंदाज वेधशाळेने वर्तवला आहे. वारा (30-40 किमी ताशी) वेगाने पुढे सरकेल. तर 27 डिसेंबरला विर्दभात हलक्या पावसाची शक्यता वर्तवण्यात आली आहे.
3)Isolated to scattered rainfall over Madhya Pradesh, Vidarbha, Chhattisgarh, Bihar, Jharkhand, Odisha and West Bengal & Sikkim during 27th to 29th December.
— India Meteorological Department (@Indiametdept) December 24, 2021