नंदुरबार : जिल्ह्यातील राज्य महामार्ग क्रमांक सहावरील ६८ मीटर लांबीचा पूल गुरुवारी सकाळी कोसळला. हा पूल धानोरा आणि ईसाईनगर गावाजवळील रंका नदीवर आहे. या दुर्घटनेत कोणतीही जीवित हानी झालेली नाही. महाराष्ट्र राज्य परिवहन महामंडळाची बस आणि मालमोटार गेल्यानंतर काही क्षणातच पूल कोसळला.
१९८२ साली सदर पूल बांधण्यात आला होता. सुमारे ४० वर्ष जुना हा पूल होता. राज्य महामार्ग क्रमांक सहा पुढे थेट गुजरातकडे जातो. पूल कोसळल्यामुळे गुजरातकडे जाणारी वाहतूक सुंदरदेमार्गे खांडबाऱ्याकडे आणि सूरतहून नंदुरबारकडे येणारी वाहतूक केसरपाडा, निझरमार्गे वळविण्यात आली आहे.
