सहावी खेलो इंडिया युथ गेम्स; कबड्डीमध्ये महाराष्ट्राचे दोन्ही संघ पराभूत
हरयाणा, राजस्थान संघांकडून महाराष्ट्र पराभूत
![6th Khelo India Youth Games, Both Maharashtra teams defeated in Kabaddi](https://mahaenews.com/wp-content/uploads/2024/01/Kabbadi--780x470.jpg)
चेन्नई | हर्षल देशपांडे
साखळी फेरीतील दोन्ही लढती महाराष्ट्र संघाने गमावल्या. मुलांच्या संघाला राजस्थान संघाने तर मुलींच्या संघाला हरयाणा संघाने पराभूत करताना सहाव्या खेलो इंडिया युथ गेम्समध्ये आगेकूच केली. आजच्या पराभवामुळे उद्या होणाऱ्या दोन्ही लढतींमध्ये महाराष्ट्राला विजयाची आवश्यकता असणार आहे. उद्याच्या लढतींमध्ये मुलींसमोर तामिळनाडू तर मुलांसमोर मध्यप्रदेश संघाचे आव्हान असणार आहे.
चेन्नई येथील जवाहर नेहरू इनडोअर स्टेडियम येथे झालेल्या आजच्या लढतीमध्ये मुलींच्या गटातून हरयाणा संघाने महाराष्ट्राला ४५-४० असे ५ गुणांच्या फरकाने पराभूत केले. महाराष्ट्र संघाने आक्रमक सुरुवात कराताना मध्यंतराला २३-१३ अशी आघाडी घेतली होती. यामध्ये महाराष्ट्राची कर्णधार हरजित कौर संधू, आर्या पाटील यांनी चढाया तर भूमिका गोरेने पकडी करताना १८ गुणांची कमाई करून दिली होती. यामुळेच मध्यंतराला महाराष्ट्राने १० गुणांची आघाडी घेतली होती.
हेही वाचा – कंठ दाटला, आवाज गहिवरला, सोलापुरात पंतप्रधान नरेंद्र मोदी भावूक
मध्यंतरानंतर हरयाणा संघाने खेळ उंचावला. कोमल कुमारीने २ वेळा ४ गुणांची चढाई करताना पहिल्या ४ मिनिटांमध्येच संघाला आघाडी मिळवून दिली. या चढायानंतर महाराष्ट्राच्या संघाला पुन्हा आघाडी घेता आली नाही. मध्यंतरानंतर महाराष्ट्राने १७ गुणाची कमाई केली तर हरयाणा संघाने ३२ गुण मिळविताना विजय साकारला.
मुलांच्या गटाच्या लढतीत राजस्थान संघाने महाराष्ट्रावर ३४-२८ अशी ६ गुणांनी मात केली. आजच्या लढतीत सुरुवातीपासून महाराष्ट्राच्या खेळाडूंना लय सापडली नाही. राजस्थान संघाने आक्रमक पावित्रा घेताना मध्यंतराला २०-१२ अशी तब्बल ८ गुणाची आघाडी घेतली होती.
मध्यंतरानंतर महाराष्ट्राच्या अनुज गावडे, वरून खंडागळे व विशाल ब्राम्हणे यांनी खेळ उंचवला. महाराष्ट्राने मध्यंतरानंतर राजस्थानला आक्रमक प्रत्त्युत्तर देताना १६ गुणांची कमाई केली. परंतू मध्यंतरापूर्वी राजस्थान संघाने घेतलेली आघाडी महाराष्ट्राच्या खेळाडूंना मोडून काढता आली नाही.