१८ लाखांच्या दागिन्यांची चोरी कर्नाटकात अन् थरारक घटना धुळ्यात; काय घडलं पहा नेमकं?
धुळे : मुंबईहून मंगलोर येथे जाणाऱ्या एका बसमधून तब्बल १८ लाखांचे सोन्याचे दागिने लुटून धुळे मार्ग मध्यप्रदेशात पसार होण्याचा अट्टल गुन्हेगारांच्या टोळक्याचा प्रयत्न होता. पण हा प्रयत्न कर्नाटक पोलिसांनी धुळे पोलिसांच्या मदतीने हाणून पाडला. सोनगीर पोलीस ठाण्याच्या हद्दीत असलेल्या सोनगीर टोल नाक्यावर सापळा रचून या टोळक्याला फिल्मी स्टाइल पद्धतीने कर्नाटक पोलिस आणि धुळे पोलिसांनी अटक केली आहे. पोलिस अधीक्षक प्रवीणकुमार पाटील यांनी आज पत्रकार परिषद घेत या गुन्ह्यासंदर्भात माहिती दिली. १६ जूनला मुंबईहून मंगलोर येथे जाणाऱ्या एका खासगी बसमधून १८ लाखांचे सोन्याचे दागिने लुटरण्यात आल्याची तक्रार कर्नाटक राज्यातील बाईंदूर पोलीस स्टेशनला दाखल करण्यात आली होती. या घटनेचा तपास करत कर्नाटक पोलिस धुळ्यात पोहचले.
या गुन्ह्यासंबंधी धुळे स्थानिक गुन्हे शाखेचे पोलिस निरीक्षक हेमंत पाटील यांना गोपनीय माहिती मिळाली होती. मारुती कार MP 09 W 9284 या वाहनातून कर्नाटक राज्यातील सोने चोरी प्रकरणातील टोळी धुळे मार्गे मध्यप्रदेशात जात असल्याचे त्यांना कळले. त्यातच कर्नाटक पोलिसांचे पथक देखील त्यांचा तपास करत धुळ्यात आले आहे. या सर्व घटनेची माहिती घेऊन धुळे पोलिस, सोनगीर पोलिस आणि कर्नाटक पोलिसांच्या पथकांनी सोनगीर टोल नाका येथे सापळा रचला.
रविवारी रात्री बारा वाजेच्या सुमारास आरोपींची कार टोलनाक्यावर येताच त्यांना अडवण्याचा प्रयत्न केला. मात्र चोरट्यांनी पळण्याचा प्रयत्न केला. यावेळी कर्नाटक पोलिस आणि धुळे पोलिसांनी सोनगीर पोलिसांच्या मदतीने फिल्मी स्टाईलने अट्टल गुन्हेगारांच्या वाहनावर झडप टाकून चोरट्यांच्या मुसक्या आवळल्या. या झटापटीत कर्नाटक येथील दोन पोलिस कर्मचारी जखमी झाले. मात्र कर्नाटक पोलिस आणि धुळे पोलिसांच्या मदतीने अट्टल गुन्हेगारांना अखेर जेरबंद करण्यात पोलिसांना यश आले आहे. यानंतर धुळे एलसीबी कार्यालयात अट्टल गुन्हेगारांची चौकशी करण्यात आली. कर्नाटकात चोरी केल्याची कबुली त्यांनी दिली. यावेळी त्यांच्या कारमधून १८ लाखांचे सोने पोलिसांनी जप्त केले आहे. याप्रकरणी चार आरोपींना धुळे पोलिसांनी पुढील कारवाईसाठी कर्नाटक पोलिसांच्या ताब्यात दिले आहे, अशी माहिती पोलीस अधीक्षक प्रवीणकुमार पाटील यांनी दिली.