हॉटस्पॉट वगळता कोरोनाचा फैलाव नसणा-या भागात दिली जाणार सूट
राज्यातील काही भागांत पुरेशी काळजी घेऊन, अटी व शर्तींच्या अधीन राहून २० एप्रिलनंतर औद्योगिक, व्यावसायिक उपक्रम सुरू होणार अशी माहिती मुख्यमंत्री उद्धव ठाकरे यांनी दिली आहे. अर्थव्यवस्थेचे चक्र हळूहळू का होईना फिरतं राहण्याच्या दृष्टीने हे सुधारित मार्गदर्शक आदेश जारी करण्यात आले आहेत. कोरोना विषाणूचा फैलाव रोखण्यासाठी गेल्या महिन्यात लॉकडाऊनची घोषणा करण्यात आली आहे, या लॉकडाऊनचा कालावधी ३ मे पर्यंत वाढवण्यात आला आहे. अत्यावश्यक सेवा वगळता सर्व सेवा बंद करण्यात आल्या आहेत, मात्र २० एप्रिलनंतर हॉटस्पॉट वगळता ज्या भागात कोरोनाचा फैलाव नाही अशा भागात सूट देण्यात येणार आहेत.
कोरोनाचा मुकाबला करणे हे लॉकडाऊनचे मूळ उद्दिष्ट्य अबाधित राहून कंटेंनमेंट क्षेत्र घोषित केलेली ठिकाणे वगळून इतरत्र स्थानिक प्रशासनाच्या अधिकारात हे सुधारित आदेश लागू राहतील, अशी माहिती मुख्यमंत्र्यांनी दिली आहे. मात्र सोशल डिस्टन्सिंग, स्वच्छतेचे नियम पाळण्यासह नियमित मास्क घालणे आणि इतर कोणत्याही बाबी शिथिल करण्यात आलेल्या नाहीत, असे मुख्यमंत्री उद्धव ठाकरे यांनी स्पष्ट केले.
कुठल्याही कारणांसाठी गर्दी झालेली चालणार नाही. धार्मिक उत्सव, प्रार्थनास्थळांवरील गर्दी, मेळावे, खेळाच्या स्पर्धा, परिषदा, सभा यांच्या आयोजनाला परवानगी असणार नाही. या भागातील शिकवण्या आणि प्रशिक्षण संस्था या बंदच राहतील, मात्र शिक्षक ऑनलाइन कोचिंग क्लासद्वारे विद्यार्थ्यांना शिकवू शकतात असंही मुख्यमंत्र्यांनी सांगितलं आहे.