सुरक्षा भेदून शेतकऱ्याच्या मुलीचा उद्धव ठाकरेंकडे हट्ट, माझ्या उंबऱ्याला पाय लावा…
सातारा | महाईन्यूज
राज्यातील दुष्काळग्रस्त भागातील भीषण परिस्थिती पाहता शिवसेना पक्षप्रमुख उद्धव ठाकरे हे शुक्रवारी (दि. 15) सातारा-सांगली जिल्ह्यातील ओला दुष्काळ पाहणी दौऱ्यावर गेले. अनेक गावांना भेटी देऊन शेतकऱ्यांशी संवाद साधला. यातील एक भेट उद्धव ठाकरे यांच्यासाठी अत्यंत खास ठरली. उद्धव ठाकरेंनी काटेवाडी गावातील भानुदास कोरडे या शेतकऱ्याच्या कुटुंबाची त्यांच्या घरी जाऊन भेट घेतली. यावेळी या कुटुंबाचं शिवसेनेविषयीचं प्रेम पाहून उद्धव ठाकरे भारावून गेले
काटेवाडी गावातील शेतीच्या नुकसानीच्या पाहणीनंतर उद्धव ठाकरे हे पुढील गावांमधील पीक नुकसानीची पाहणी करण्यासाठी गाडीकडे निघाले. त्यांच्या आजूबाजूला असणाऱ्या सुरक्षा रक्षकांनी गर्दीला बाजूला करत त्यांना वाट करून दिली. मात्र, या गर्दीत एका मुलीचा उद्धव ठाकरे यांना भेटण्याचा प्रयत्न सगळ्यांच्या कुतूहलाचा विषय ठरला. ही मुलगी सगळ्या सुरक्षा रक्षकांना बाजूला करत पुढे येण्याचा प्रयत्न करत होती. शिवसेना पक्षप्रमुखांनी तिच्या घरी दोन मिनिटे का होईना येण्याचा हट्ट तिने धरला होता. अखेर उद्धव ठाकरे यांना तिचा हट्ट पुरवावा लागला आणि ते थेट तिच्या घराकडे निघाले.
पुढे उद्धव ठाकरे आणि मागे त्यांचा सगळा लवाजमा. उद्धव ठाकरे चालत त्या मुलीच्या घरी पोहेचले. हे घर भानुदास कोरडे नावाच्या शेतकऱ्याचं होतं. भानुदास कोरडे हे शिवसैनिक आणि त्यांची मुलेही शिवसेना आणि बाळासाहेबांच्या विचारांवर चालणारी. आपल्या घरात चक्क शिवसेनाप्रमुखांचा मुलगा उद्धव ठाकरे हे आल्याचं पाहून या कुटुंबातील अबालवृद्धांचे चेहरे उजळून निघाले. उद्धव ठाकरे यांनीही सर्व कुटुंबाला स्वतःसोबत उभं करून फोटो काढला. उद्धव ठाकरेंच्या विनम्रतेने हे कुटुंब भारावून गेलं, त्यांना अश्रू अनावर झाले. जेव्हा या कुटुंबातील सदस्य उद्धव ठाकरेंच्या पाया पडायला आले, तेव्हा उद्धव ठाकरेंनी त्यांना थांबवलं आणि मी एक सामान्य माणूस आहे कुणी देव नाही, असं ते म्हणाले.
