थुंकी अंगावर उडाल्याने दारुच्या नशेत मारहाण, एकाचा मृत्यू

अहमदनगर : दुचाकीवरुन जात असताना थुंकी अंगावर उडाल्याने दारुच्या नशेतील तिघांनी दुचाकीस्वाराला बेदम मारहाण केली. यामध्ये दुचाकीस्वाराचा मृत्यू झाला. ही घटना बुधवारी रात्री दहा वाजण्याच्या सुमारास आयुर्वेदिक चौकात घडली. याप्रकरणी तीन आरोपींना पोलिसांनी रात्रीच अटक केली आहे. महेश बाळाप्पा बारसे( वय-३५, माळीवाडा) असे मारहाणीत मृत पावलेल्या तरुणाचे नाव आहे. रवी उत्तम साठे, आनंद एकनाथ सकट, रोहित श्रावण केदारी यांना कोतवाली पोलिसांनी अटक केली आहे. याप्रकरणी विशाल हिरामण बारसे याने कोतवाली पोलीस ठाण्यात फिर्याद दाखल केली आहे.

सविस्तर माहिती अशी की, बुधवारी रात्री दहा वाजण्याच्या सुमारास मयत महेश बारसे हा दुचाकीवरून आयुर्वेद चौकातून जात होता. याचवेळी येथे असणा-या तिघांचा अंगावर थुंकी गेली. त्यामुळे दारुची नशेतील आरोपी रवी उत्तम साठे, आनंद एकनाथ सकट, रोहित श्रावण केदारी यांनी महेश यास बेदम मारहाण केली. ही घटना पुतण्या विशाल हिरामण बारसे यास समजली. त्यानंतर त्याने सिव्हील हॉस्पिटलमध्ये महेश यास उपचारासाठी दाखल केले. मात्र उपचारादरम्यान महेशचा मृत्यू झाला. कोतवाली पोलीस ठाण्याचे मुकुंद दुधाळ यांना घटनेची माहिती मिळताच त्यांनी घटनास्थळी धाव घेतली. त्यानंतर शाहिद शेख, रवींद्र घुंगासे, भारत इंगळे यांनी आरोपींचा शोध घेत तासाभरात तीनही आरोपींना अटक केली.