चार वर्षांत पुणे-नाशिक हायस्पीड रेल्वे धावणार – खासदार अमोल कोल्हे
पुणे |महाईन्यूज|
पुणे-नाशिक रेल्वे प्रकल्प रखडला आहे. आता या मार्गावर सेमी हायस्पीड प्रकल्प उभारण्यात येणार असून, त्यासाठी आवश्यक केंद्र आणि राज्य सरकारी परवानग्या लवकरच मिळतील. तसेच, राज्य मंत्रिमंडळासमोर हा प्रस्ताव लवकरच मंजुरीसाठी येणार आहे. आगामी चार वर्षांत पुणे-नाशिक सेमी हायस्पीड प्रकल्प पूर्ण होईल, अशी माहिती खासदार डॉ. अमोल कोल्हे यांनी दिली.
पुणे श्रमिक पत्रकार संघातर्फे आयोजित वार्तालापात डॉ. कोल्हे बोलत होते. ते म्हणाले, पुणे-नाशिक महामार्गावरील कोंडी दूर करण्यासाठी चांडोली, चाकण, मोशी या ठिकाणी सहापदरी रस्ता करण्यात येणार आहे. राजगुरूनगर घाट बायपास दिवाळीमध्ये सुरू होणार आहे.
किल्ल्यांचे संवर्धन करून राज्यामध्ये पर्यटन व्यवसायास चालना मिळू शकते. त्यातून मोठ्या प्रमाणावर रोजगारनिर्मिती करता येईल. त्या अंतर्गत भीमाशंकर येथे राष्ट्रीय वनौषधी प्रकल्प उभारण्यासाठी नुकतेच प्राथमिक सादरीकरण केले आहे. हा महत्त्वाकांक्षी प्रकल्प लवकरच पूर्ण करण्यात येईल. तसेच, पर्यटनवाढीच्या दृष्टीने भक्ती-शक्ती प्रकल्पाच्या माध्यमातून जुन्नर येथे शिवसंस्कार सृष्टी उभारण्यात येणार आहे. या संदर्भात पर्यटनमंत्री आदित्य ठाकरे यांच्याशी नुकतीच चर्चा झाली आहे. जिल्ह्यातील पर्यटनवाढीसाठी ठाकरे यांच्याकडून सकारात्मक प्रतिसाद मिळाला आहे, असेही डॉ. कोल्हे यांनी सांगितले.
बैलगाडा शर्यती सुरू करून त्यातून स्थानिकांना रोजगार उपलब्ध करून देण्यासाठी केंद्रीय पशुसंवर्धन मंत्री गिरीराज सिंग यांच्यासोबत नुकतीच बैठक पार पडल्याचेही कोल्हे यांनी सांगितले.
