breaking-newsताज्या घडामोडीपुणेमहाराष्ट्र
अजित पवारांचे मेहुणे अमरसिंह पाटील यांचे निधन
पुणे |महाईन्यूज|
राज्याचे माजी गृहमंत्री डॉ. पद्मसिंह पाटील यांचे लहान बंधू अमरसिंह पाटील (वय ५०) यांचे पुण्यात आज पहाटे निधन झाले. उपमुख्यमंत्री अजित पवार यांच्या पत्नी सुनेत्रा पवार यांचे ते धाकटे बंधू होते. अमरसिंह गेली अनेक वर्षे पुण्यातच वास्तव्यास होते.
मागील काही काळापासून अमरसिंह यांना एका आजाराने ग्रासले होते. मधल्या काळात त्यांच्या डोक्यावर अवघड शस्त्रक्रिया करण्यात आली होती. अनेक दिवसांपासून त्यांच्यावर अतिदक्षता विभागात उपचार सुरू होते. अखेर त्यांची आज प्राणज्योत मालवली. मनमिळावू स्वभाव असलेले अमरसिंह सर्वांना ‘काका’ म्हणून परिचित होते. त्यांनी उस्मानाबाद जिल्ह्यातील तेर या मूळ गावाचे सरपंच पद पाच वर्षे भूषवले होते. शेती हा त्यांच्या आवडीचा विषय होता. काही काळ त्यांनी शेतीपूरक व्यवसायही केला होता.