जगातील सर्वात मोठ्या गॅस प्रकल्पावर इराणचा मिसाईल हल्ला
Iran Attack on Qatar LNG Plant | पर्शियन आखातातील तणाव अधिकच तीव्र होत असताना इराणने कतारमधील जगातील सर्वात मोठ्या एलएनजी (द्रवीकृत नैसर्गिक वायू) निर्यात प्रकल्पावर क्षेपणास्त्र हल्ला केल्याची धक्कादायक घटना घडली आहे. गुरुवारी पहाटे झालेल्या या हल्ल्यात प्रकल्पाचे मोठे नुकसान झाल्याची प्राथमिक माहिती समोर आली आहे.
अधिकाऱ्यांच्या माहितीनुसार, इराणने एकूण पाच क्षेपणास्त्रे डागली होती. त्यापैकी चार क्षेपणास्त्रे निष्प्रभ करण्यात यश आले, मात्र एक क्षेपणास्त्र थेट रास लाफान येथील एलएनजी प्रकल्पावर आदळले. या स्फोटामुळे प्रकल्पात आग लागली असून ती विझवण्यासाठी कतारी प्रशासनाचे प्रयत्न सुरू आहेत.
गेल्या काही दिवसांपासून आखाती प्रदेशात तणावपूर्ण परिस्थिती निर्माण झाली आहे. इस्रायलने इराणच्या दक्षिण पार्स गॅस फील्डवर हल्ला केल्यानंतर इराणने प्रतिहल्ल्याचा इशारा दिला होता. कतार, संयुक्त अरब अमिराती आणि सौदी अरेबिया हे संभाव्य लक्ष्य असल्याचे संकेतही देण्यात आले होते.
हेही वाचा : वाघोलीत मातृशक्तीच्या हस्ते ६८व्या महाराष्ट्र केसरी कुस्ती स्पर्धेचा भव्य शुभारंभ
दरम्यान, या महिन्याच्या सुरुवातीलाच वारंवार होणाऱ्या हल्ल्यांमुळे जागतिक एलएनजी पुरवठ्याचा मोठा हिस्सा असलेल्या या प्रकल्पात उत्पादन थांबवण्यात आले होते. तसेच हबशान येथील गॅस सुविधांनाही नुकसान झाल्याने अबू धाबी प्रशासनाने त्या बंद केल्याची माहिती आहे.
या हल्ल्यामुळे जागतिक ऊर्जा बाजारात मोठी खळबळ उडाली असून तेल आणि गॅसच्या किमतींवर त्याचा परिणाम होण्याची शक्यता व्यक्त केली जात आहे. रास लाफान प्रकल्पातील नेमक्या नुकसानाची माहिती अद्याप समोर आलेली नसली तरी पुरवठ्यावर परिणाम होण्याची भीती व्यक्त केली जात आहे.
कतारने या हल्ल्याचा तीव्र निषेध करत याला राष्ट्रीय सुरक्षेवरचा थेट हल्ला म्हटले आहे. तसेच कतार सरकारने इराणी सरकारी कार्यालयांतील नागरिकांना २४ तासांत देश सोडण्याचे आदेश दिले आहेत.
