#CoronaVirus: नेतान्याहू यांनी मानले मोदींचे आभार; म्हणाले ‘माझे प्रिय मित्र आणि…”
इस्रायलचे पंतप्रधान बिन्यामिन नेतान्याहू यांनी भारताचे पंतप्रधान नरेंद्र मोदी यांचे आभार मानले आहेत. भारताने इस्रायलला पाच टन औषधांची निर्यात केली आहे. यामध्ये मलेरियाविरोधात वापरल्या जाणाऱ्या हायड्रॉक्सीक्लोरोक्विन गोळ्यांचाही समावेश आहे. या गोळ्या करोनावरील उपचारासाठी फायद्याचे असल्याचे बोलले जात आहे. भारताने एवढ्या मोठ्या प्रमाणात औषधे पाठवल्यानेच नेतान्याहू यांनी मोदींचे आभार मानले आहेत.
नेतान्याहू यांनी गुरुवारी एक ट्विट करुन मोदींचे आभार मानले. यामध्ये त्यांनी मोदींचा उल्लेख प्रिय मित्र असा केला आहे. “क्लोरोक्विन इस्रायलमध्ये पाठवल्याबद्दल मी माझे प्रिय मित्र आणि भारताचे पंतप्रधान नरेंद्र मोदी यांचे आभार मानतो. इस्रायलच्या सर्व नागरिकांतर्फे धन्यवाद,” असं नेतान्याहू यांनी आपल्या ट्विटमध्ये म्हटलं आहे.
Thank you, my dear friend @narendramodi, Prime Minister of India, for sending Chloroquine to Israel.
— Prime Minister of Israel (@IsraeliPM) April 9, 2020
All the citizens of Israel thank you! 🇮🇱🇮🇳 pic.twitter.com/HdASKYzcK4
करोनाच्या रुग्णांवर उपचार करण्यासाठी वापरण्यात येणारी औषधे बनवण्यासाठी आवश्यक असणारे साहित्य आणि औषधे घेऊन भारताने पाठवलेले विमान मंगळवारी इस्रायलमध्ये दाखल झालं. त्यानंतर दोन दिवसांनी नेतान्याहू यांनी भारताचे आभार मानले आहेत.
