भाजप खासदार प्रज्ञा ठाकूर पुन्हा चर्चेत, जागेवरुन विमानातील क्रू मेंबर्सशी वाद

भोपाळ | आपल्या वक्तव्यामुळे नेहमीच चर्चेत राहणाऱ्या भाजपच्या खासदार साध्वी प्रज्ञा सिंह ठाकूर पुन्हा एकदा चर्चेत आल्या आहेत. यावेळी स्पाईस जेटच्या विमानात प्रवासी आणि क्रू मेंबर्ससोबत जागेवरुन प्रज्ञा ठाकूर यांनी वाद घातल्याचे समोर आले आहे. या सर्व गोंधळामुळे विमानाच्या उड्डाणाला उशीर झाल्याची माहिती स्पाईस जेट प्रशासनाने दिली.

या घटनेचा व्हिडीओदेखील समोर आला असून हा व्हिडीओ सध्या सोशल मीडियावर व्हायरल होत आहे. प्रज्ञा सिंह ठाकूर यांनी स्पाईस जेटच्या विमानात ए 1 ही सीट बूक केली होती. विमानातील पहिल्या रांगेतील सीट्स या इमरजन्सीसाठी असतात आणि या सीट्स केवळ शारीरिकदृष्ट्या सुदृढ असलेल्या प्रवाशांनाच दिल्या जातात. प्रज्ञा ठाकूर विमानात पोहोचल्या त्यावेळी त्या पहिल्या रांगेतील सीटवर बसल्या. मात्र क्रू मेंबर्सनी त्यांना आपली जागा बदलून ‘नॉन इमरजन्सी’ सीटवर बसण्यास सांगितलं. मात्र प्रज्ञा ठाकूर यांनी जागा बदलण्यास स्पष्ट नकार दिला आणि वाद घालण्यास सुरुवात केली.