जळगावमध्ये शिवसेनेने धक्का दिल्यानंतर खडसेंची पहिली प्रतिक्रिया; म्हणाले…

जळगाव |

जळगाव जिल्ह्यातील मुक्ताईनगरमधील भाजपाच्या सहा नगरसेवकांनी शिवसेनेत प्रवेश केला आहे. वर्षा या मुख्यमंत्री उद्धव ठाकरे यांच्या सरकारी निवासस्थानी हा पक्षप्रवेश पार पडला. भाजपातून राष्ट्रवादी काँग्रेसमध्ये प्रवेश केलेल्या ज्य़ेष्ठ नेते एकनाथ खडसे यांच्यासाठी हा धक्का मानला जात आहे. याचं कारण म्हणजे मुक्ताईनगर हा एकनाथ खडसेंचा बालेकिल्ला आहे. एकनाथ खडसे यांनी नगरसेवकांच्या शिवसेना प्रवेशावर भाष्य केलं असून आणखी चार नगसेवक प्रवेश करणार असल्याचा शिवसेनेचा दावा फेटाळला आहे. भाजपाचे आणखी चार नगरसेवक शिवसेनेत येणार आहेत, असं पालकमंत्री गुलाबराव पाटील यांनी सांगितलं आहे. एकनाथ खडसे यांनी मात्र दावा फेटाळला आहे. तसंच सहा नाही तर पाच नगरसेवकांनी प्रवेश केल्याचं ते म्हणाले आहेत. “जे नगरसेवक गेलेले दिसत आहेत त्यापैकी फक्त चार नगसेवक चित्रात दिसत आहेत. अपक्षासहित एकूण पाच नगरसेवक गेल्याचं दिसत असून त्यातील तीन नगरसेवकांविरोधात अतीक्रमण केलं, बनावट दाखला जोडला या कारणासाठी जिल्हाधिकाऱ्यांकडे सुनावणी सुरु आहे. एक नगरसेविका चार मुलं असल्याने आधीच अपात्र ठरली आहे,” असे एकनाथ खडसेंनी सांगितलं आहे.

मुक्ताईनगर येथील भाजप नगरसेवकांनी आज शिवसेना पक्षप्रमुख, मुख्यमंत्री उद्धव बाळासाहेब ठाकरे यांच्या हस्ते शिवबंधन बांधून शिवसेनेत जाहीर प्रवेश केला.

यावेळी मंत्री @mieknathshinde जी, गुलाबराव पाटील जी, शिवसेना आमदार चंद्रकांत पाटील जी उपस्थित होते. pic.twitter.com/QSFOqNVxNz

— ShivSena – शिवसेना (@ShivSena) May 26, 2021

अपात्रतेच्या भीतीपीटी हे नगरसेवक गेले आहेत असा दावा एकनाथ खडसेंनी केला असून नऊ नगरसेवक माझ्यासोबत आहेत असा दावाही केला आहे.

गुलाबराव पाटील यांची प्रतिक्रिया –
“मुक्ताईनगरमधील भाजपाचे नगरसेवक एकनाथ खडसे यांच्यामुळे राष्ट्रवादीत जातील असंच सर्वांना वाटत होतं. पण त्यांनी शिवसेनेत येण्याचा निर्णय घेतला. आम्हाला त्याचा आनंद आहे. यानिमित्ताने भाजपचे नगरसेवक महाविकास आघाडीत आले याचा एकनाथ खडसे यांनाही आनंदच होईल,” अशी आशा गुलाबराव पाटील यांनी व्यक्त केली आहे.

वाचा- “उद्धव बेटा मी तुझी शिक्षिका बोलतीये; कृपया मदत कर,” ९० वर्षीय सुमन रणदिवेंची आर्त हाक