कल्याण | कल्याणकडून गोरखपूरकडे जाणाऱ्या गोदान एक्स्प्रेसची अज्ञात प्रवाशाने साखळी खेचल्याने ही गाडी आंबिवली आणि शहाड दरम्यान थांबली, मात्र ज्या बोगीतील साखळी खेचण्यात आली, ती नदीवरील पुलावर थांबल्याने ब्रेक पूर्ववत करण्याचे आव्हान रेल्वेसमोर होते. एक्स्प्रेसचे लोको पायलट ए. आर. मिश्रा यांनी हे आव्हान पेलले. आपला जीव धोक्यात घालून गाडीचे इंजिन चालू असताना गाडीखालून जात ब्रेकचा खटका वर केला. यानंतर गाडी मार्गस्थ झाली. मिश्रा यांनी दाखविलेल्या धाडसाचे कौतुक होत आहे. प्रवाशांनी अशा प्रकारे हजारो प्रवाशांच्या जिवाशी खेळून साखळी खेचू नये, असे आवाहन रेल्वे प्रशासनाकडून करण्यात आले आहे.
कल्याणकडून गोरखपूरकडे जणारी गोदान एक्स्प्रेस कल्याण स्थानकातून मार्गस्थ झाली. दुपारी ३ वाजण्याच्या सुमारास ही एक्स्प्रेस शहाड आणि आंबिवलीदरम्यानच्या उल्हास नदीवर रेल्वेच्या पुलावरून जात असताना अज्ञात प्रवाशाने गाडीतील अत्यावश्यक साखळी खेचली. यामुळे गाडीला इमर्जन्सी ब्रेक लागल्याने ती जागच्या जागी थांबली. मात्र ज्या बोगीतील साखळी खेचण्यात आली होती, ती नदीवरील पुलावर होती. गाडीखालून जात ब्रेकचा खटका वर करायचे आव्हान होते. गाडीचे लोको पायलट मिश्रा यांनी चालकाची परवानगी घेत गाडीला लटकून त्याखाली जात खटका वर केला. यानंतर ही गाडी मार्गस्थ झाली. मिश्रा यांनी केलेल्या या कौतुकास्पद कामगिरीचा व्हिडीओ पाहिल्यानंतर रेल्वेच्या अधिकाऱ्यांनी त्यांच्या धाडसाचे कौतुक केले. तसेच प्रवाशांनी कारण नसताना आपल्याबरोबर प्रवास करणाऱ्या हजारो प्रवाशाचा जीव धोक्यात घालू नये, असे आवाहनही करण्यात आले.
