#CoronaVirus: भारतात २४ नमुन्यांमागे एक रिपोर्ट कोरोना पॉझिटिव्ह

भारतात २४ नमुन्यांची Covid-19 ची चाचणी केल्यानंतर एकाचा रिपोर्ट पॉझिटिव्ह येत आहे. सरकार आणि इंडियन काउन्सिल ऑफ मेडिकल रिसर्चने ही माहिती दिली. जपान, इटली, अमेरिका आणि यूके या देशांशी तुलना केल्यास त्यांनी एक करोना पॉझिटिव्ह रुग्ण शोधून काढण्यासाठी भारतापेक्षाही कमी चाचण्या केल्या आहेत.

“जपानमध्ये ११.७ चाचण्यांमागे एकाचा करोना टेस्टचा रिपोर्ट पॉझिटिव्ह येत आहे. इटलीत ६.७ नमुन्यांमागे एक पॉझिटिव्ह रुग्ण सापडत आहे. अमेरिकेत ५.३ तर यूकेमध्ये ३.४ चाचण्या करण्यात आल्या” आयसीएमआरचे आर.आर.गंगाखेडकर यांनी ही माहिती दिली. अन्य देशांच्या तुलनेत भारतात चाचण्यांचे प्रमाण कमी नाहीय. २४ पैकी २३ जणांच्या नमुन्यांचे रिपोर्ट निगेटिव्ह येत आहेत असे त्यांनी सांगितले.