काकडेंना काहीही द्या, फक्त कोश्यारी असेपर्यंत विधान परिषद देऊ नका, गिरीश बापटांची गुगली

राष्ट्रवादीचे नेते अंकुश आण्णा काकडे यांनी लिहिलेल्या ‘हॅशटॅग पुणे’ या पुस्तकाचे प्रकाशन राष्ट्रवादीचे अध्यक्ष शरद पवार यांच्या शुभहस्ते बालगंधर्व रंगमंदिरात पार पडले. या कार्यक्रमाला खासदार वंदना चव्हाण, माजी आमदार उल्हास दादा पवार, प्रा.मिलिंद जोशी आणि इतरही मान्यवरांनी उपस्थिती लावली. या कार्यक्रमात मान्यवरांनी केलेल्या भाषणात जोरदार फटकेबाजी केली. पवारांनी जुन्या आठवणी जागवल्या. बापटांनी अंकुश अण्णांबरोबच्या जुन्या मैत्रीला नव्याने उजाळा दिला. तर उल्हास पवारांनी अण्णांचा स्वभाव आणि गुणवैशिष्ट्ये अधोरेखित केली.

• गिरीश बापटांची तुफान फटकेबाजी

गिरीश बापट यांनी आपल्या भाषणाची सुरुवातच अंकुश अण्णांना पोपट म्हणून केली. मी बापट असलो तरी तो पोपट आहे, नुसता पोपटासारखा गोड गोड बोलतो. पण असो, माझा मित्र चांगला आहे, तो लिहितोही चांगला, असं एकंदरित पुस्तकावरुन दिसतंय, अशी टोलेबाजी गिरीश बापट यांनी भाषणादरम्यान केली.

भाषण जसं जसं रंगात येऊ लागलं तशी तशी बापटांची अधिक वेगाने फटकेबाजी करायला सुरुवात केली. पवारसाहेब माझ्या मित्राला (अंकुश अण्णा काकडे) काहीही द्या पण फक्त भगतसिंह कोश्यारी असेपर्यंत राज्यपाल विधान परिषद देऊ नका, असा विनंतीवजा टोला त्यांनी लगावला. बापटांच्या गुगलीने अख्खं बालगंधर्व रंगमंदिर हास्यकल्लोळात बुडालं.

• अण्णांचं पुस्तक म्हणजे पुण्याचे सर्वांगीण दस्तावेजीकरण

ज्या कोणाला पुण्याची नस आणि पुण्याची गुणसूत्रे जाणून घ्यायची आहे, त्यांनी हे पुस्तक आवर्जून वाचावे. या पुस्तकात पुण्याच्या अमृततुल्यपासून तर पुण्यात साजरा होणारा गणेशोत्सव, उरूस या सगळ्यांसह सामाजिक, सांस्कृतिक, राजकीय आढावा घेतला आहे. हे पुस्तक म्हणजे पुण्याचे सर्वांगीण दस्तावेजीकरण आहे, अशा शब्दात शरद पवार यांनी अंकुश काकडे यांच्या पुस्तकाचं कौतुक केलं.