मराठी अभिनेत्रीवर भडकले चाहते, जीव धोक्यात घालून रील

मुंबई : सोशल मीडियावरील व्हिडिओसाठी अनेकदा इन्फ्लूएन्सर स्टंटबाजी करतात. जीव धोक्यात घालून रील बनवल्याच्या घटना अलीकडच्या काळात घडल्या आहेत. याप्रकरणी काहींना मोठ्या प्रमाणात ट्रोलिंगचा सामना करावा लागला. असेच काहीसे ट्रोलिंग छोट्या पडद्यावरील एका लोकप्रिय अभिनेत्रीचेही झाल्याचे पाहायला मिळाले. जरी तिने व्हिडिओ शूट करताना योग्य खबरदारी घेतल्याचे म्हटले असले तरीही अभिनेत्रीला काळजी घेण्याचा आणि रस्त्यावर अशाप्रकारे व्हिडिओ न काढण्याचा सल्ला मिळाला आहे.

‘पुन्हा कर्तव्य आहे’च्या वसुंधराचा व्हिडिओ

ही अभिनेत्री दुसरी तिसरी कोणी नसून ‘पुन्हा कर्तव्य आहे’ या झी मराठीवरील मालिकेत वसुंधरा हे मुख्य नायिकेचे पात्र साकारणारी अभिनेत्री अक्षया हिंदळकर आहे. अक्षयाने अलीकडेच मुंबईच्या रस्त्यांवरुन प्रवास करताना हा व्हिडिओ शूट केला आहे. ज्यामध्ये दिसते आहे की, अक्षया फ्रंट सीटवर बसली आहे आणि तिने खिडकीतून डोके बाहेर काढले. यानंतर ती हातही बाहेर काढून मोकळा रस्ता आणि अवखळ वाऱ्याचा आनंद घेताना दिसली.

अक्षयाने हा व्हिडिओ शेअर करताना असे कॅप्शन दिले की, ‘व्हेअर टू मिस, टेक मी टू द स्टार्स’. तिचा हा व्हिडिओ डान्सर-कोरिओग्राफर ऋतुजा जुन्नरकरने शूट केला आहे. तिने कॅप्शन देताना अशी तळटीपही दिली की, ‘मित्रांनो, शांत व्हा… मी हा व्हिडिओ योग्य खबरदारी घेऊन शूट केला आहे.’

अभिनेत्री झाली ट्रोल

अक्षयाने जरी असे नमूद केले असले की तिने हा व्हिडिओ योग्य ती खबरदारी घेऊन शूट केला आहे, तरी तिला ट्रोलिंगचा सामना करावा लागला. एका युजरनेने अशी कमेंट केली की, ‘चालत्या गाडीतून डोक बाहेर काढू नये’. अन्य एकाने कमेंट केली की, ‘पुढच्या वेळी काळजी घे, आयुष्य हे सर्वात महत्त्वाचे आहे’. ‘मुंबईच्या रस्त्यांवर काही ठिकाणी भेगा आढळल्या आहेत, त्यामुळे काळजीपूर्वक’, अशीही कमेंट एका युजरने केली. एका फॅनने तर चिडूनच विचारले की, ‘काय करते आहेस, दुखापत झाली तुला तर… काळजी घे’.

एका युजरने रस्त्यावरील सीसीटीव्ही फुटेजची तिला आठवण करुन देत म्हटले की, ‘खरं सांगायचं तर हे खूप जोखमीचे आहे. शिवाय हे जर रस्त्यावरील कॅमेऱ्यात कैद झाले, तर तू अडचणीत सापडू शकतेस’. ‘गाडी चालू असताना खिडकीतून डोकं का बाहेर काढलं आहेस?’, असंही एकाने विचारलं. एक कमेंट अशी आहे, ‘जरी तू खबरदारी घेतली असलीस तरी अशाप्रकारचा व्हिडिओ तुझ्यासारख्या जबाबदारी मुलीकडून येणं, अजिबात प्रशंसनीय नाही. अक्षया असं काही करू नको. आशा करते की हे तुला समजेल’. ‘रील्सच्या नादात डोकं सांभाळा अपघात टाळा’, असा सल्लाही एकाने दिला.

दरम्यान अशाप्रकारच्या कमेंटवर अद्याप अक्षयाने कोणतीही प्रतिक्रिया दिलेली नाही. मात्र प्रेक्षकांनी तिच्या काळजीपोटी या प्रतिक्रिया दिल्याचे दिसून येते आहे. अक्षयाच्या कामाबद्दल सांगायचे झाल्यास ती सध्या झी मराठीवरील ‘पुन्हा कर्तव्य आहे’ या मालिकेत अभिनेत्री अक्षय म्हात्रेसह मुख्य भूमिकेत आहे. याआधी तिने ‘सरस्वती’, ‘सात जल्माच्या गाठी’, ‘तुझ्या इश्काचा नाद खुळा’ या मालिकांमध्ये काम केले होते.