माझ्यासाठी प्रार्थना करा! रुग्णालयात जाण्यापूर्वी भावुक झाला संजय
मुंबई – बॉलिवूड अभिनेता संजय दत्त हा फुप्फुसाच्या कर्करोगावरील उपचारासाठी मुंबईतील कोकिलाबेन रुग्णालयात दाखल झाला आहे. मंगळवारी सायंकाळी ७ वाजताच्या सुमारास तो आपल्या वांद्रे येथील घरातून रुग्णालयात जाण्यास निघाला. त्यावेळी त्याच्यासोबत पत्नी मान्यता दत्त आणि बहिण प्रिया व नम्रता होत्या. यावेळी पत्रकार आणि छायाचित्रकारांनी संजयला तब्येतीविषयी विचारणा केली असता ‘माझ्यासाठी प्रार्थना करा’, असे भावुक आवाहन त्याने केले. त्याचे हे शब्द ऐकूण मान्यता दत्तदेखील भावुक झाली आणि तिने संजयला ‘जादू की झप्पी’ दिली.
मान्यता दत्तने मंगळवारी एक पत्रक प्रसिद्ध करून संजय त्याच्या आजारासाठीचे सर्व प्राथमिक उपचार मुंबईतच करणार असल्याचे सांगितले. ‘आम्ही त्याचे (संजय दत्तचे) प्राथमिक उपचार मुंबईतच करणार आहोत. पुढील बेत हे कोविड 19 बाबतची एकंदर परिस्थिती पाहून आखण्यात येतील. सध्याच्या घडीला कोकिलाबेन रुग्णालयातील सर्वोत्तम डॉक्टर संजूची काळजी घेत आहेत, त्याच्यावर उपचार करत आहेत’, असे मान्यता म्हणाली. त्याचबरोबर संजय दत्तच्या आजाराबाबत, कर्करोग ज्या टप्प्यात आहे त्याबाबत तर्कवितर्क लावणे थांबवा आणि डॉक्टरांना त्यांचे काम करुद्या, अशी विनंतीही तिने सर्वांना केली आहे. शिवाय संजूबाबाच्या तब्येतीबाबतची सर्व माहिती वेळोवेळी आपण देत राहू याची हमीही तिने दिली.
दरम्यान, संजय दत्तला ८ ऑगस्ट रोजी रुग्णालयात दाखल करण्यात आले होते. गळ्यात पाणी जमा झाल्याने त्याला श्वसनाचा त्रास होत होता. त्याची कोरोना चाचणीही करण्यात आली. मात्र ती निगेटिव्ह निगेटिव्ह आली होती. त्यानंतर संजय दत्तला कर्करोगाचे निदान झाल्याची माहिती 11 ऑगस्ट रोजी रात्री उशिरा समोर आली होती.